Zesareak saihesteko teknologia berri bat garatu du CIC nanoGUNEk

Erditzean haurren arrisku fisiologikoak uneoro denbora errealean kontrolatzeko aukera ematen duen teknologia berri ez-inbaditzaile bat garatu du nanoGUNEko Nanoingeniaritza Taldeak. Teknologia horrek "erabaki azkarrak hartzen laguntzen die obstetrei, eta, horrenbestez, mundu osoan egiten diren zesarea kopurua gutxitzen", ikerketa zentroak prentsa ohar baten bidez jakinarazi duenez.

"Gure teknologia Raman espektroskopiaren konbinazioan oinarritzen da, aplikazio bakoitzerako zunda espezifikoekin, eta makinen ikaskuntzarako algoritmo multiparametrikoekin. Algoritmo horiek aldakuntza edo anomalia fisiologikoen irudi sistemikoa hartzen dute kontuan, egungo teknologian, berriz,  parametro bakar bat, pH-a edo laktatoa adibidez, da, erabakiak hartzeko oinarria", azaldu du Andreas Seifertek nanoGUNEko Nanoingeniaritza taldeko arduradunak.

Seiferten hitzetan, "Raman espektroskopia bibrazio-espektroskopia oso espezifikoa da , eta parametro biokimikoen aldaketak zuzenean edo zeharka detekta ditzake. Makina bidezko ikaskuntza erabiliz eta aldaketa biokimiko guztiak kontuan hartuz, askoz ere sailkapen sentikorragoa eta egonkorragoa lortzen da egoera patologikoetan eta asfixia perinatalarekin lotutako parametro espezifikoen iragarpenean", azaldu du.

Ion Olaetxea ikertzailea bere doktore-tesiaren baitan ari da proiektu hau garatzen, eta teknologiaren ezaugarri berritzaile eta bereizgarriak azpimarratu ditu: "Ez dugu zuzeneko lehiakiderik aurkitzen. Denbora errealean eta inolako etenik gabe egiten dugun monitorizazio ez-inbaditzaileak lehiarako abantaila nabarmena ematen digu, eta hain zuzen ere horrek bereizten gaitu gaur egungo diagnostiko-metodoetatik".

Teknologia patente-eskaera baten bidez babestuta dago orain, eta "prestakuntza maila ona du, horrek inbertitzaile pribatuentzat erakargarri egiten du", adierazi du Ainara Garcia nanoGUNEko Teknologia Transferentziako arduradunak.

Teknologia berriaren ikertzaile-taldea. Argazkia: Nanogune.

"Arrisku-kapitalen intereseko deiak jasotzen ari gara, gure teknologiak erakartzen dituenak", erantsi du. Gainera, "BBK Venture Philanthropy programaren 1. fasera pasa da teknologia, eta erakutsi du merkatua prest dagoela metodo konbentzionalen alternatibak xurgatzeko", azaldu du Garcíik. 

"Arreta obstetrikoan aplikatzeaz gain, teknologiak ahalmen handia du beste gaixotasun batzuetarako, hala nola sepsia, nekea, minbizia edo gaixotasun infekziosoak. Kirol-artikuluen industrian ere, bereziki lehiaketa-kiroletan, aplikazio-aukera handiak ikusten ditugu", esan du Andreas Seifertek. "Raman zundaren diseinu optomekanikoa aldatuz eta sailkapen- eta erregresio-eredu berriak garatuz, irtenbide espezifikoak egin daitezke aplikazio bakoitzerako", gaineratu du.