Wroclawek Hiriburutza ireki du Donostia 2016ko presentziarekin

Poloniako Wroclaw hiriak, Donostiarekin Europako Kultur Hiriburutza partekatzen duenak, kultur programaren inaugurazio-ekitaldien egun handia bizi izan du, eta han dago Donostia 2016ren ordezkaritza bat hiriburu senidea babesten.

Eduardo Txillida euskal eskultoreari buruzko erakusketaren irekieran egon dira Donostia 2016ko ordezkariak, hau izan baita inaugurazio-ekitaldietako bat.

Eneko Goia, Donostiako alkatea, Miren Azkarate, Hiriburutzaren zinegotzi delegatua, Cristina Uriarte, Eusko Jaurlaritzaren Kultura sailburua, Joxean Muñoz, Eusko Jaurlaritzaren Kultura sailburuordea, Denis Itxaso, Kultura, Turismo, Gazteria eta Kirol diputatua, Pablo Berástegui, Donostia 2016ren zuzendari orokorra, eta Xabier Paya, Donostia 2016ren kultur programaren zuzendaria izan dira Donostia 2016 Wroclawen ordezkatu duten kideak

Wroclaw 2016ren inaugurazioaren programak ia ehun jarduera hartu ditu barne asteburuan zehar, tartean, kontzertuak, erakusketak eta ikuskizunak. Gaurko ekitaldi nagusia hiriko lau txokoetatik Rynek plazara (Merkatuaren plaza) aterako diren lau desfileek osatuko dutena da. Desfilea hiriko lau espirituak (Sinesmen askotarikoen espiritua, Berrikuntzaren espiritua, Berreraikitzearen espiritua eta Uholdeen espiritua) irudikatuko dituzten artistek zuzenduko dituzte.

Wroclaw 2016ren goiburua, Edertasun-guneak, metamorfosiaren eta aniztasunaren ideietan oinarritzen da, eta hiriaren eraldaketa-historia bereziari egiten dio erreferentzia. 2016 urtean ehunka herritarrek ekitaldi publiko askotan hartuko dute parte. Urtean zehar, baita ere, Wroclaw Liburuaren Munduko Hiriburuan bilakatuko da Unescok hala izendatuta, eta Europako Literaturaren Gauaren edizio berezi bat ere izango du. Kultur programak barne biltzen ditu gainera Nazioarteko Jazzaren Eguna, Europak abesten du Jaialdia eta Antzerkiaren Nazioarteko Olinpiadak.