UAGAk Barredo sailburuaren dimisioa eskatu du bazkaren aferaz egindako adierazpenengatik

Nekazarien elkarteen eta Eusko Jaurlaritzaren arteko tentsioa areagotzen ari da azken egunetan, lehortearen kudeaketa eta aziendarentzako bazkaren erosketa direla eta. UAGA Arabako elkarteak Amaia Barredo sailburuaren dimisioa eskatu du ostegun honetan, hark Radio Euskadin egindako adierazpenen ostean. "Arduragabekeria, ezjakintasuna eta entzuteko gaitasun eza" leporatu dizkio, eta Jaurlaritzaren "immobilismoa" salatu du, eta sektorearen errealitatetik "urrundu izana".

Eusko Jaurlaritzako Elikadura, Landa Garapen, Nekazaritza eta Arrantza sailburuak "Boulevard" saioan adierazi du Eusko Jaurlaritzak "lanean" jarraitzen duela bazka batera erosteko, Bazkaren Mahaia irailerako deitzeagatik jaso dituen kritikei erantzunez. Espero du irailean sektorearen esku jarriko dituela erosteko bideak, uste baitu bazkaren defizit handiena urritik aurrera izango dela.

Barredoren hitzei erantzunez, oharra kaleratu du UAGAk. Sailburuaren adierazpen horiek "arduragabekeria" eta abeltzainen eguneroko lanari erakutsitako "benetako errespetu falta" direla adierazi du. "Gure animaliek egunero jaten dute, eta aste horiek gainkostua dakarte, baina Lakuako bulego batetik sailburuak ez du larritzat jotzen", gaineratu du.

Horrek gogorarazi duenez, sektoreak "asteak daramatza egoera hori pairatzen", eta bazka euren kontura erosten hasi dira; izan ere, Eusko Jaurlaritza "beste behin ere berandu eta gaizki iritsiko den beldur" da.

UAGAk deitoratu egin du, gainera, sailburuak adierazi izana "udaberrian sektoreak % 20 bazka gehiago jaso" duela. "Non, Barredo andrea?", erantzun dute, eta honakoa gaineratu dute: "Ez dakigu zer den larriagoa: sailburuak adierazpen horiek ezjakintasunetik egin eta akatsa egin izana edo diskurtso publikoa difamatzeko eta desitxuratzeko asmoz egin izana".

Horregatik, Barredoren dimisioa eskatu du, "bere adierazpen arduragabeengatik, ez duelako sektorearen errealitatea ezagutzen eta ez duelako entzuteko gaitasunik erakutsi".

EHNEk "aparteko laguntzak" eskatu ditu

Bestalde, EHNE baserritarren elkarteak ostiral honetan lehorteak utzitako ondorioen gaineko bere eskaerak jakinarazi ditu sare sozialetan argitaratutako bideo baten bidez. Bittor Lokatek azaldu duenez, lehortearen ondorioz "egoera muturrekoa" da, eta bazka eta ur gastuak handitzeaz gain, "ekoizpenean eragin zuzena" izan du.

Horren harian, Eusko Jaurlaritzari ezohiko laguntza ekonomikoen lerro bat eskatu dio "jasandako kalte ekonomiko eta produktiboa konpentsatzeko", eta abelburu bakoitzeko zenbakiak ere proposatu ditu; hasi hegazti bakoitzeko euro bateko laguntzatik eta abelburu bakoitzeko 200 euroko laguntzaraino. Larreak ereiteko dirulaguntzak eta lehorte egoera ezartzeko ere galdegin du EHNEk, eta "bazkaren erosketa publikoa aukera erreala eta azkarra" izateko eskatu du.