Txosnak "gune seguruak" izango dira Aste Nagusian erasoak jasaten dituztenentzat

Bilboko Konpartsek ostiral honetan aurkeztu dituzte larunbatean hasiko den Aste Nagusirako protokoloak, eta iragarri dute txosnak "erreferentziazko gune seguruak" izango direla jaietan erasoren bat jasan edo ikusten dutenentzat.

Konpartsen federazioak egunero zaintza-txandak izango ditu erasoa jasan duten pertsonei arreta emateko. Harrera "enpatikoa" izango dutela azaldu dute, eta ez dela inor epaituko ezta haren kontakizuna zalantzan jarriko ere.

Laguntza eta arreta

Erasoa jasan duten pertsonak leku seguru batera lagunduko dituzte eta, hala nahi izanez gero, konpartsak beste eragile edo erakunde batzuekin harremanetan jarriko dira, besteak beste, Gizarte Larrialdietako Udal Zerbitzuarekin (SMUS) eta Poliziarekin.

Protokoloek eraso sexista, arrazista, faxista, euskarafobo, polizial edo LGTBIfobikoei aurre egiteko jarduerak jasotzen dituzte. Erasoren bat gertatuz gero, goizero egiten diren informazio-mahaietan erabakiko dute konpartsek zer erantzun eman, betiere erasoa jasan duen pertsonaren baimenarekin.

"Erasoek ez dute lekurik"

Bilboko Konpartsek defendatu dute Aste Nagusiak "errespetua, aniztasuna, askatasuna eta berdintasuna" sustatzeko gunea izan behar duela, eta dei egin dute erasoen aurrean antolatzen diren gaitzespen-mobilizazioetan parte hartzera.

Federazioa kezkatuta agertu da azken jaietan kaleko saltzaileek bizi izan duten egoeragatik. Jazarpenak, atxiloketak eta materialaren konfiskazioak salatu dituzte, eta "pertsona guztientzako tratu duina" eskatu dute.

Halaber, euskaldunentzako jai "askeak" aldarrikatu dituzte, eta euskaraz hitz egiteagatik edo zerbitzatzeagatik pertsonak zalantzan jarri edo erasotu dituzten egoerak salatu dituzte.