Baliteke 10.000 lagun hil izana Libian protestak hasi direnetik

Gutxienez 10.000 lagun hil dira Libian Muamar Gadafiren erregimenaren kontrako protestak hasi direnetik, Al Arabija telebistan Sayed al Shanuka Nazioarteko Zigor Auzitegiko kideak esan duenez.

Parisetik egindako adierazpenetan, ia 50.000 lagun zauritu dituztela esan du Al Shanukak.

Bengazi eta ekialdeko beste herri batzuk bonbardatzeari uko egin ostean, bi pilotuk hegazkina utzi eta jausgailuarekin salto egin dute. Ondoren, hegazkin militarrak behea jo du, Quryna Libiako egunkariak jakinarazi duenez.

Beste hegazkin batek Maltan lur hartzeko baimena eskatu du, baina bertako agintariek ukatu egin diote. Hegazkinean ustez Aisha Gadafi Libiako diktadorearen alaba zihoan, Al Yazira telebistak jakitera eman duenez.

Bestalde, "48 ordutan" Libia utzi nahi duten espainiar guztiak herrialdetik ateratzeko konpromisoa hartu du Trinidad Jimenez Atzerri ministroak Alder Popularraren aurrean, Jorge Moragas PPko Nazioarteko Harremanetarako koordinatzaileak jakitera eman duenez.

61 espainiar heldu dira Madrilera

Repsol YPF konpainiak pleitatutako hegazkina Barajaseko aireportura heldu da arratsaldean 131 bidaiarirekin, horien artean 61 espainiar, enpresako iturriek jakitera eman dutenez.

Libian geratzen diren 50 bat herritar ostiralean ebakuatzea espero du Atzerri Ministerioak.

Kontrol galera

Muamar al Gadafi Libiako diktadorea herrialdearen kontrola galtzen hasi da. Halaber, hainbat goi-funtzionariok dimisioa aurkeztu dute eta Europar Batasunak erregimenari zigorrak jartzea aztertuko du gaur arratsaldean.

Horren ildotik, Franco Frattini Italiako Atzerri ministroak adierazi du Zirenaika eskualdea (Libiako ipar-ekialdea) oposizioaren esku dagoela jada.

Gadafik ohartarazi du ez duela agintea utziko eta "kalez kale" manifestarien aurka borroka egingo duela, baina Gobernuan eta Armadan pertsona asko ihes egiten hasi dira.

Gaur goizean, Libiako Armadak Al Yabal al Ajdar inguruan dituen ofizialek iragarri dute bat egin dutela herritarren "iraultzarekin", Al Yazira eta Al Arabija telebista-kateek eskainitako mezu batean. Halaber, inguru horretan Armada herritarren menpe dagoela baieztatu du.

Azken orduetan, gutxienez zortzi enbaxadore libiarrek eta beste hainbat diplomazik dimisioa aurkeztu dute, jazarpenaren aurka protesta egiteko.

Hain zuzen ere, Libiak AEBetan, Polonian, Indian, Indonesian, Australian, Malaysian, Bangladeshen eta Arabiar Ligan dituen enbaxadoreek eman dute dimisioa.

EBk 100.000 pertsona ebakuatuko ditu

Bestalde, nazioartean kezka nagusietako bi gatazkak sor lezakeen emigrazioa eta euren herritarren segurtasuna da. Horrenbestez, Europar Batasuna (EB) plan bat prestatzen ari da hurrengo egunetan Libiatik 10.000 europar ebakuatzeko.

Europako Batzordeko bozeramaile batek jakinarazi duenez, ebakuazioa egiteko moduak aztertzen ari dira, baina baliteke itsasotik egitea.

Emigratzaileen exodoa

4.000-5.000 pertsonak Libiako muga zeharkatu dute gaur goizaldean, Tunisian sartzeko asmoz, NBEn Errefuxiatu Agentziaren (ACNUR) iturriek zehaztu dutenez.

Aipatu iturrien arabera, emigratzaile ekonomikoak eta jazarpenatik ihesi doazen pertsonak ere daude muga zeharkatu dutenen artean. Gehienak Libiakoak dira, baina Aljeriakoak eta Egiptokoak ere badaude.