Matxinoek eta NATOk Gadafi inguratu dute

Matxinoek Tripolin sartzea lortu dute eta hauen eta Gadafiren aldekoen arteko istuluak gogorrak dira. Matxinoek erregimenaren bukaera "oso gertu" dagoela adierazi dute. Libiako oposiziogile batek matxinoek Tripoli laster harrapatuko dutela esan du.

Bitartean, Gadafik arma-gordetegiak herritarrentzat zabaltzeko agindu du, hiriburua defendatu dezaten. Ez dutela inoiz amore emango azpimarratu du eta "borrokan jarraitzeko" esan die herritarrei.

NATOk Muamar al Gadafiren kuartel nagusia eta Maitikako aireportua bonbardatu ditu Tripolin. Gainera, Maitikan atxilotu dute Al Jituni koronela, Gadafiri lotuta dagoen militarren nagusienetariko bat.

Matxinoen iturriek Tarhuna hiriko kontrola hartu dutela adierazi dute Al Jazeera telebista katean. Tarhuna hiria Tripolitik 60 kilometrotara hegoaldean aurkitzen da.

Gadafiren erregimenaren aurka dauden matxinoak hiriburuko auzo ezberdinetan matxinatu dira. 200 bat miliziano itsasotik ailegatu dira baita ere, Misratatik etorrita.

Aurkako indarra hiriburutik 27 kilometrotara daude eta gutxienez lau auzo kontrolatzen lortu dituzte.

Horretaz gain, matxinoek Tripoliko aireportu militarraren eta zenbait auzoren kontrola hartu dute. Erreboltarien eta Muamar Gadafiren aldeko tropen arteko borrokek jarraitu egiten dute eta tarteka leherketak ere entzun daitezke, inguruko ekintzaile eta kazetariek esandakoaren arabera.

Bashir Sewehli ekintzaile libiarrak Al Jazeera telebista kateari egindako hitzetan "aireportua matxinoen eskuetan dago eta Tripoliko beste zenbait eremu eta inguru ere kontrolpean dituzte". Hala ere, matxinoek "laguntzaren zain daude", gaineratu du.

Gadafiren aldeko 31 soldadu hil dira Tripoliko borroketan eta matxinoek beste 42 harrapatu dituzte, Al Jazeeraren arabera.

Gadafik kontraerasoa eskatu du

Tartean, Muamar Gadafik entzutezko mezua bidali du Libiako telebistara. Mezu horretan matxinoen kontrako kontraerasoa egitera bultzatu du herria, erreboltariak Tripoliko zenbait auzoetan sartu eta gero.

"Maskarada honekin amaitu behar dugu. Zuetako milioika pertsona arerioek suntsitutako hiriak askatu behar dituzue", esan du Gadafik mezuan Al Jazeera telebistaren arabera.

Libiako lehen ministroa, Tunisian

Mahmudi el Baghdadi Libiako lehen ministroa Tunisiako irla batetako hotelean dago. Antza han eman ditu azken 24 orduak.

Matxinoen ordezkari batek Al Yazira telebistan jakinarazi duenez, Libiako Transizio Kontseiluak Al Baghdadiren extradizioa eskatzeko asmoa du.

Nazioarteak Gadafiri amore emateko exijitu dio

Catherine Ashton Europar Batasuneko Kanpo Harremanetarako eta Segurtasunerako goi ordezkariak adierazi duenez, Muamar Gadafiren erregimena "azkenetan" dago eta Libiako agintariari "atzerapenik gabe" boterea utz dezala exijitu dio "sarraski handiagoak sahiesteko".

Halaber, Europar Batasunak Libiako herria babestuko duela adierazi du lurraldean demokrazia ezar dezaten. Ashtonen gertukoek adierazi dutenez, Europar Batasuneko kideak hilabeteak daramatzate Libiako transizio prozesua nola bultzatu eztabaidatzen.

Hala, lurralde osoan bakea eta egonkortasuna mantentzeko helburuarekin "zibilak babesteko" eta "arduraz jokatzeko" eskatu dio Catherine Ashtonek Libiako Transizio Kontseiluari Bitartean Europako Batzordea gaur kaleratuko duen txosten bat prestatzen ari da.

Barack Obama AEBetako presidentearen ustez, Gadafiren erregimena ahulduta dagoela nabarmena da, eta biktima gehiago izan ez daitezen "behingoz" boterea uzteko exijitu dio.

Matxinoak Tripolin egiten ari diren aurrerapausoa ikusita, lurralde horretan izaten ari den "sarraskiarekin" amaitzeko modurik seguruena agintariak boterea uztea dela esan du Obamak. "Erraza da: Gadafik bere agintanldia amaitu dela onartu behar du", esan du.