Argentinako egiturak

Argentinan, fiskal bat hilda azaldu da. Fiskal horrek estatuko agintari gorenari, presidenteari, politiko bati, lepora dakiokeen deliturik larriena leporatu zion, bere eskumenak eta eragina erabili izana historian zehar herrialde horretan gertatu den atentatu larrienaren egileak babestu eta era berean bere helburu politikoak eta ekonomikoak lortzeko. Fiskalaren aldekoek presidente horri leporatu zioten heriotzaren edo hilketaren erantzukizuna, berehala presidenteak esan zuen ez zuela uste fiskalak bere buruaz beste egin zuenik, lehendabizi erabili egin zutela eta ondoren hilda etekin handiagoa aterako ziotelako eta presidentearen aurka erabiltzeko balio handiagoa izango zuelako.

Gero jakin genuen fiskalak egin zituen salaketak egiteko, zerbitzu sekretuek emandako informazioa erabili zuela eta ez bere kabuz lortutakoa.Hilabete lehenago presidenteak zerbitzu sekretu horietako burua bota zuela eta guztia mendekua izan zitekeela. Ondoren zabaldu zen orain dela 21 urte egindako atentatu larri hura ez dela argitu besteak beste poliziak eta ikerlariek ez dutelako benetako interesik izan zer gertatu zen jakiteko. Urte hauetan behin eta berriz salatu da epaileak eta fiskalak borrokan izan direla, bakoitzak izendatu duen politikoa edo alderdia defenditzen egia ahaztuta. Atentatua izan zen garaian agintari gorenak zirenek atentatuaren eragileak eta egileak babesten saiatu zirela eta benetako atentatugileak zeintzuk ziren jakin ez zedin zurrumurruak eta informazio faltsuak zabaldu zituztela, gehien bat atentatua han bertan antolatu eta burutu zela erakusteko eta ez zutela kanpoan antolatu eta kanpotarrek egin.

Ordezkari politikoak, epaileak eta fiskalak,p oliziak,armada buruak ,zerbitzu sekretuak, enpresariak, sindikatu buruak… Estatuaren ustezko ordezkariak eta arduradunak, ustez herritarren askatasuna eta segurtasuna babestu behar dutenak, Munduaren aurrean herri horren irudia direnak… Guztiak azaltzen zaizkigu borrokan, baina ez gizarte hobe baten alde, ez demokrazia sendotzeko, bakoitzak berea lortu eta gordetzeko. Urtetan erakundeen arduradunek, estamendu gorenetako ordezkariek, bizitza eta oinarrizko ongi izatea ziurtatu behar zituztenek arau eta mugarik gabeko borroka zikinena izan dute,guztiak balio izan du norberaren helburuak lortzeko, 85 pertsonen hilketak edo lapurreta basatienak txikikeriak izan dira. Axola al dio fiskala hil egin duten edo bere buruaz beste egin ote duen?