Garaiak eta sasoiak

Pertsona bat kaiolan sartu, atea itxi eta su ematea gizakiaren garai ilunenetako irudia da, Erdi Aroko Inkisizioaren denboretara garamatzana. Baina basakeria hori zehaztasun handiko kameraz grabatu eta Interneten bidez mundu guztira zabaltzea gaur egungo ohituren adierazle da zalantzarik gabe. Gerra arauak bete eta giza eskubideak errespetatuta Estatu Islamikoari eraso egitea eta mendean hartu dituzten lurretatik botatzeko ahalegina jokaera modernoa izan liteke, giza arauen aldarrikapena. Hegazkin gidaria hil dutelako preso ditugun bi islamiar goizaldera urkatzeak orain dela lau mila urteko logikara itzularazten gaitu, Hammurabiren Kodigoa giza jokaeraren ardatza zeneko garaietara, ‘begia begi truk” logikaren eta justiziaren mugak markatzen zituen denboretara.

Mundua txiki geratzen ari zaigu, armek, pertsonok eta irudiek ez dute mugarik, oraintxe gertatzen ari dena oraintxe bertan ikus genezake munduaren beste puntan. Baina, era berean, errealitatearen ikuspegiak inoiz baino anitzagoak dira eta inoiz baino urrutiago daude, milaka kilometrora ditugunak gure baloreak izan ditzakete eta aldamenean bizi denak antikristoaren berraragiztatzetzat har gaitzake prakamotzetan goazelako. Gizateriak inoiz bizi izandako gerra beldurgarrienaren ondoren Nazio Batuak sortu ziren eta Giza Eskubideen aldarrikapena egin zuten herrialde gehienek, era horretan arau orokorrak jarri nahi izan zituzten ideologia, sinismen eta erlijioen gainetik, eta arbitraietarako erakundea sortu zuten, estatu eta elizen eraginetik haratago. Baina Mundu globalizatu hau sortu duten tresnek eta alde guztietara iritsi den teknologiak ez dute lortu pentsamenduak zabaltzea eta teknologia berri horiek erabili daitezke inongo eragozpenik gabe ideia eta proiektu atzeratuenak, zaharkituenak albokoari edo urrutien dagoenari ezartzeko.

Baliabide modernoenek mezu zaharrenak zabaltzeko erabiltzen ari gara, sasoi ilunenetako irudi eta portaerak argiaren abiadaz nahi dugun lekuan jar genitzake. Jakituria zabaldu, elkar ezagutza indartu eta hobetzeko balio behar liguketen tresnak, beldurra eta nazka irudikatzeko,norberekeria sendotzeko eta garai harrigarrienetara itzularazteko erabiltzen ari gara.