Hasiera eta amaiera

Gizakiaz, familiaz eta tribuaz haratago harremanak eta komunikatzeko aukerak bazeudela ohartu zenean sortu ziren herria eta hiria. Taldeak antolatzeko arauak etorri ziren ondoren, borrokak galarazi eta elkarrekiko oinarrizko errespetua izan zedin. Hasiera hori Tigris eta Eufrates ibaiak elkartzen diren lurretan gertatu zen, gaur egun, Irak eta Iran izena duten herrialdetan. Liburu batzuk paradisua bera lur oparo hauetan kokatzen dute.

Han eta orduan emandako lehen pauso horien oinordeko gara guztiok, lurrak hezi eta animaliak abere bihurtuta hobeto elikatu eta beste zeregin batzuetarako denbora lortu genuen, zer ginen eta nora gindoazen galdetu genion gure buruari, ideia bakanak kateatuz teoriak eraiki genituen, Mundua zer zen edo zer izan zitekeen pentsatu genuen eta ondoren zibilizazioa deitu duguna harreman horien oinarri bihurtu dugu.

Guzti hori, esan bezala, orain dela 8 mila urte sortu zen gure ekialdean, Mediterraneoa basamortu bihurtzen den lurretan, ibai handi eta emankorrek harea mortu hori baratz bihurtzen duten mugetan. Eta han, giza aberea gizaki huts egiten hasi zen lekuan paradisua infernu bihurtu dute. Orain dela 1.400 urte idatzitako lege, arau eta aholkuak egi bakartzat hartuta, bizitza eta heriotza antolatzen hasi dira, egin daitekeena eta debekatuta dagoena ezartzen, zuzena eta okerra zer den zalantza izpirik gabe adierazten.

Bizarra mozteagatik 50 zigor kolpe jaso ditzakezu, emakumea izan eta behar bezala estaltzen ez badituzu zure ezaugarriak urkamendira joan zaitezke, homosexual izate hutsagatik kanpandorretik bota zaitzakete … Kobazulo ilunenetan sortu eta garatutako jokaera anker eta errukigabeak, argiz betetako pantailetan islatzen dizkigute ohartu gaitezen sufrimenduak eta, batez ere, beldurrak beste edozein adierazpen baino indar eta eragin handiagoa dutela.

Zibilizazioa eta kultura iragana bihurtu dira, elkarrizketa eta eztabaida amaitu dira, abereak basati bilakatu dira berriro, eta hiria tribu, eta herria familia.