Turismoa

Guztiok bidaiariak izan nahi dugu, gure joan-etorriek abentura kutsua izan ditzatela, besteek aitor dezatela zein ausartak garen edo zein ondo aukeratzen ditugun gure irteerak; baina gehienok, ia guztiok, turistak gara. Antolatutako bidai arruntak egiten ditugu, gu bezalakoentzako prestatutako lekuetan jan eta lo egiten dugu, eta, azkenean, antzerako istorioak kontatzen ditugu eta leku beretsuen argazkiak erakusten ditugu. Baina horrek ez gintuzke kezkatu behar, turismoa gizakion jarduera ekonomiko nagusia delako, eta herri askoren diru iturri ia bakarra.

Turismoa, edo gure denbora librea kanpora atera eta beste leku batzuk ezagutzeko erabiltzea kontu berria da. Garai batean mertzenarioek, aristokratek eta abenturazaleek bakarrik zuten hortarako aukera. Gizaki arruntok bidaiatu ahal izateko lan baldintza egokiak behar izan ditugu, eta hori batez ere Bigarren Mundu Gerra ondoren gertatu zen.

40 ordu eta 5 eguneko lan astea, ordaindutako oporrak, soldata egokiak, langabezia saria, erretiroa… Horrek guztiak ordaindutako denbora librea eman zigun eta hor hasi ginen, batez ere Europan eta Estatu Batuetan, bidaiak egin eta urrutiko lekuak ezagutzen.1950eko hamarkadan, munduan 25 miloi turista zeuden; 70 hamarkadan, 190 miloi, eta, gaur egun, 1.200 milioiak gainditu ditugu.

Turismoa kontu berria da eta urte gutxitan erabat masifikatu da, batez ere Hegoamerika eta Asiako biztanleek mugitzeko aukera izan dutenetik. Turismoari gaitz asko leporatu zaio, baina alde onak ere badituela esan genezake: beste baliabiderik ez duten herrietan lanpostuak sortu eta aberastasuna banatzeaz gain, kulturen nahasketa eta komunikazioa ere eragin ditu, beste herri, pertsona eta pentsamoldeak ezagutzeko balio izan du.Aldaketa politikoa, edo gutxienez mentalitate aldaketa, eragin izan du, normalean herrialde itxietan edo demokratikoak ez direnetan, jendeak han bertan ukatzen zaiona ikusteko aukera izan duelako turismoari esker.

Alde txarren artean, turistak jasotzen dituzten herrietako kultura eta nortasuna sarri zapalduta geratzen dela, turistek nagusikeria erakusten dute eta gutxietsi egiten dituzte bertakoak. Kutsadura dezente eragiten du turismoak, besteak beste hegazkin eta ibilgailuen mugimenduaren ondorioz. Ingurumenari egindako kaltea ere nabarmena da, batez ere oinarrizko errespetu arauak betetzen ez direnean.

Turismoa gutxi batzuen aukera izatetik, arruntegia izatera pasatu da denbora gutxian, baina agian guztiok jendea garela eta jendearen joan-etorriek komunikazioa, mugimendua eta aldaketa eragiten dituztela jakinda, ez ginateke gehiegi kezkatu behar gure irteerak Marco Polo edo Amundsenenak ez badira.