Munduko Gobernua

Historiak ezagutu duen gerra basatiena amaitu zenean, gerraren irabazleek horrelakoak betirako galaraziko zituen tresna sortzea erabaki zuten. 1945ko urrian 51 herrialdek Nazio Batuen Erakundea sortu zuten.

Gatazkak eta arazo larrienak elkarrizketa eta negoziazioen bidez konpontzea zen erakunde haren helburu nagusia. Ondoren egitura aberasten eta zabaltzen joan da, gizakion jarduera oro arautu eta bideratzeko asmotan. Lana, osasuna, ekonomia, politika… legeak eta hitzarmenak, gabeziak eta desorekak, sor zitezkeen arazoak mahai gainean jarri eta aztertzeko.

Injustiziak, boteretsuenen okerrek eta ahulenen ezinak sortutako arazoak konpontzeko azpi-erakundeak ere asmatu zituzten: kasko urdinak, errefuxiatuen laguntzarako, goseari aurre egiteko, nekazaritzan emaitza hobeak lortzeko...

Baina seguruenera Nazio Batuen lorpen handiena giza eskubideen aldarrikapena izan da. 1948an egin zuen aldarrikapen hori eta gaur egun 193 herrialdek onartzen dute horiek direla oinarrizko eskubide urraezinak eta gizaki guztioi dagozkigula.

Nazio Batuak, Munduko Gobernua osatzeko orain arte egin den ahalegin sendoena da,eta ahalegin horretan mundu guztia ohartu da zein zaila den horrelako proiektu bat aurrera ateratzea.

Nazio Batuei leporatu izan zaie boteretsuenen interesak defenditzen dituela,burokrazia gehiegi duela, jendearen arazoetatik urruti dagoela, sinesgarritasunik ez duela ez duelako jakin egoera askotan zuzen jokatzen.

Egungo egoerara egokitzeko zailtasuna ere egotzi zaizkio, besteak beste, Bigarren Mundu Gerraren irabazleek beto eskubidea dutelako oraindik.

Nazio Batuek 5.500 milioiko aurrekontua dute eta dirutza horren zati handiena Ameriketako Estatu Batuek jartzen dute, ondoren ekarpen handiena Japoniak eta Alemaniak egiten dute, gerra hartan galtzaile izan zirenek, alegia.

Dirua jartzen dutenek beti eskatu dute proiektuak eta ahaleginak zehatzak eta garbiak izan daitezela. Horretarako funtzionarioak eta langileak ezinbestekoak dira, Nazio Batuek 40.000 funtzionario dituzte eta beste milaka asko misio bakoitzaren beharren arabera hartzen dituzte.

Nazio Batuei leku guztietatik iristen zaizkie kritikak, batzuk gobernuen interesak babestea leporatzen diete,beste batzuk aldiz gobernuz osatuta dagoela ahaztu eta ordezkaritzarik ez duten taldeei kasu gehiegi egitea edo oinarrizko aldarrikapenak baztertzea.

Baina kritikak kritika mundu guztiak, gobernu guztiek, erakunde guztiek, talde guztiek Nazio Batuetara jotzen dute euren aldarrikapenak oihartzuna izan dezaten, sinesgarritasuna lortzeko edo gizateriaren aurrean zer diren edo zer nahi duten azaltzeko.

Aste honetan 70 urte bete dituen erakunde hau seguruenera ordezkatzen duen munduaren isla da, onerako eta txarrerako, baina egongo ez balitz asmatu egin beharko genuke.