Klima eta aldaketak

Ez dakigu klima aldatzen ari ote den. Aditu gehienek diote nabarmena, begi bistakoa dela gizakiok lurrari egindako kaltea, baina gehienak ez dira ausartzen klima aldatzen ari dela baieztatzera.Hala ere, garbi dago guk gure joerak eta portaerak aldatzen ez baditugu, lurra, izadia, hondamendira daramagula. Munduko boteretsuenak Parisen elkartuko dira ingurumenaz hitz egiteko, nola babestu aztertzeko eta, batez ere, gizateriaren etorkizuna ziurtatzeko zer egiteko prest diren finkatzeko.

Klima aldaketaz XX. mendeko 60ko hamarkadan hasi ziren aditu eta ekologista batzuk hitz egiten, baina lehen konpromisoak ez zituzten hartu gobernuek eta erakundeek 90ko hamarkada arte.Eta orduan ere gutxi batzuk bakarrik onartu zituzten sakrifizioak.

Azken 150 urtetan gizakiok aurreko lau mila urtetan baino gehiago kutsatu dugu lurra, eta hori gertatu da, alde batetik, muga gabe hazi garelako,7.300 miloi gara eta guztiok behar bertsuak ditugu. Bestetik, ezer  begiratu gabe erre ditugulako baliabideak eta kontrolik gabe  erabili ditugulako erregaiak.

Orain, derrigorrez, zer edo zer egin beharra dago, baina batzar guztietan eztabaida bera sortzen da. Herrialde pobreenek, edo orain arte atzerago izan direnek, diote ez dela zuzena hemendik aurrera guztiek ahalegin bera egitea,aberatsek,azken mendean Mundua menderatu dutenek askoz gehiago kutsatu dutela, kutsadura horretan oinarritu dutela euren bizimodu oparoa eta, orain, besteei, beraiek orain arte egin dutena ukatu nahi dietela.

Arrazoi osoa dute, baina itxuraz aukera gutxi dugu eta hemendik aurrerako konpromisoak guztiok bete beharko ditugu,gehiengoak gutxiengo bizimodu hori lortu ez badu ere.

Ingurumenaz eta ekologiaz sarri alor publikoaz gertatutakoa gertatu zaigu, guztiona izanik ez dela inorena. Inork ez ditu itsasoa, basoak, mendiak edo basamortuak norberaren ondasuntzat hartzen, beti iruditu zaigu hor izan direla hasieratik, hor daudela eta hor jarraituko dutela gu joan eta gero.Eta ezer gutxi axola duela guk egin dezakegunak.

Azken urtetan “kontzientzia” deitutako hori hedatu eta indartu egin da, batez ere, Mendebaldean, baina, zoritxarrez, oraindik egiten ez duguna, egiten duguna baino askoz ere handiagoa eta eraginkorragoa da, ondorioz, kontzientzia hori zabaldu eta sendotu den garai berean inoiz baino gehiago kutsatu eta hondatu dugu ingurumena.

Ingurumenaz eta ekologiaz hitz egiten hasi ginenetik, jarrera eta iritzi ezberdinak izan ditugu, eztabaidagai izan dira egin eta lortu beharrekoak. Baina itxuraz muturrera iristen ari gara, adituek diote arazoa ez dela politika kontua, gure etorkizuna, gizakion iraupena bera dagoela jokoan. Agian, horrexegatik, Parisen akordioren bat lor liteke.