Esanak eta eginak

Donald Trump Estatu Batuetako enpresa gizon ezaguna da, Alderdi Errepublikanoan lehian ari da presidentetarako hautagaitza lortzeko eta azken egun hauetan benetako eskandalua eragin du. Paris eta Kaliforniako atentatuen ondoren adierazi du musulman guztiei sarrera debekatu beharko litzaiekeela Estatu Batuetan. Hitz hauek alde guztietatik aurkako erantzuna eragin dute, eta noski, Mundu guztira zabaldu dira.

Orain dela hilabete batzuk Trumpek adierazi zuen presidente aukeratuz gero Mexiko eta Estatu Batuen arteko mugan 3 mila kilometroko hesia eraikiko zuela Mexikotik drogazaleak, bortxatzaileak eta alferrak sartu ez zitezen. Hesi hori gainera Mexikoko gobernuari ordainaraziko ziola agindu zuen.

Ingurukoentzako ere izan ditu harribitxiak. John  McCain senatari errepublikarrari buruz esan zuen ez dela heroia Vietnamen urtetan preso izan zutelako, ergel samarra baizik, etsaiak harrapatzen uzteagatik. Mitin batean, berriz, beste hautagai errepublikano baten telefonoa zein zen esan zuen eta honek baliogabetu behar izan zuen blokeatu egin ziotelako.

Trumpek presidentetarako hautagai izango zela esan zuenean, barre egin zioten, baina une hauetan hautagai errepublikanoen artean jarraitzaile gehien duena da. Berak badaki esaten dituenak ezin direla bete, baina bost axola zaio. Bere iritziz, garrantzitsuena zutaz hitz egitea, komunikabideetan azaltzea da. Trumpek dio ez dela arrazista, sentitzen duena esaten duela eta aurka dituenak, batez ere, politikoak ez direla garbiak, ez direla ausartzen pentsatzen dutena esatera zuzentasun politikoa, zuzentasun politiko faltsua nagusi delako gaur egungo gizartean.

Trump leku guztietan azaltzen da egun hauetan,ez dakigu zenbat iraungo duen, baina seguruenera ez da izango errepublikanoen hautagaia eta laster ahaztuko dugu. Baina, Trumpen jokaera ez da salbuespena. Mundu guztian, baita Europan ere, politiko askok erabiltzen du teknika bera: eskandalagarriak izan litezken adierazpenak egin, egia ez diren kontuak zabaldu, Internet eta sare sozialak erabili zurrumurruak edo ustezko gertakizunak hedatzeko … eta, batez ere, beteko ez dituztenak agintzeko. Ohikoa, normala, arrunta bihurtu zaigu politikoek kanpainan zehar zerbait agindu eta agintera iristen direnean juxtu aurkakoa egitea. Beti dago arrazoiren bat edo aitzakiaren bat, errua aurrekoena izan ohi da, krisiarena edo garai zailena.

Politikan aritzea ez da batere erraza, askotan agintera iritsi aurretik uste genuena ezinezkoa bihurtzen da eta errealitatea oso aldakorra da. Politikoei, agian, ezin diegu eskatu eredugarriak izan daitezela, baina bihurtu ezin daitezkeena da okerrenaren eredu, gizartearen gaitz eta miseria guztien adierazle. Eta, zoritxarrez,Trumpen maila barregarrira iritsi gabe gehiegitan politikoek, alderdi guztietako politikoek, baita agintean sekula izan ez direnek ere erakusten digute zein ez den eredua, zer ez dugun nahi, zer ez dugun egin behar, norantz jo behar dugun beraiek adierazitakoa ez egiteko.