Konpromisoa

Charlie Hebdo aldizkariaren aurkako atentatua gertatu zela urtea bete ondoren, orduan eta azaroan Parisen izandako erasoak direla eta, dezenteko  eztabaida piztu da. Alde batetik, atentatuei emandako eta eman beharreko erantzunaz, eta bestetik, atentatuak jasan dituztenek izandako jokaeraz.

Charlie Hebdoren azken azalak kalashnikov fusila daraman jainkoa erakusten digu eta erlijioen eragina gaitzetsi, baina askori iruditu zaio jainko horrek kristauen jaungoikoaren antz handia duela, eta ondorioz, erabaki dute aldizkariko arduradunak eta margolariak beldurtu egin direla eta ez direla ausartu Ala,,musulmanen jainkoa berriro kritikatzen. Sareetan ugari izan dira kritikak ustezko atzerapauso horrengatik.

Europan izandako atentatuei, eta batez ere,  azaroan Frantzian izandakoei emandako erantzuna ere polemikaren sortzaile izan da. François Hollande presidenteari eta Valls lehen ministroari leporatu diete George Bushek 2001ean izandako jarrera bera izatea, eredu hura hartzea indarkeriari erantzuteko eta gogor kritikatu dituzte larrialdi-egoera ezarri eta poliziari eskumen handiagoak ematea.

Europako mendebaldean, eta oro har, gizarte irekietan guztia kritika liteke eta horretan oinarritzen da gure bizikidetasuna, esateko, egiteko eta mugitzeko askatasunean. Baina,  azken atentatu hauek sortu duten egoerak galderak eragiten ditu, baina, batez ere, erantzunak eskatzen ditu.

Gutariko bakoitza zer egiteko prest dago gure gizartea babesteko, gure bizitzeko era defenditzeko, norberaren askatasuna urratu ez dezaten?. Ziur aski egoera batzuen aurrean beldurra izateak edo gobernuek hartutako erabaki zenbaitek kritikak merezi dituzte eta emandako erantzuna beste bat izan zitekeen.Baina, guk egoera horretan zer egingo genuke? Gaur egun, Europan berdin al da Eliza Katolikoa kritikatzea edo Estatu Islamikoaz barre egitea? Erantzun bera eragiten al dute? Gure lana eta gure bizitza arriskuan balego, zer egingo genuke? Gobernu demokratikoen mugak non daude?

Oso erraza da etxeko edo lagunarteko babesean ausarta izatea; gaur egun, gainera, gure jarrera ausart hori mundu guztira zabal liteke gelako ordenagailuan kolpe batzuk emanda.  Baina, baton batzuek erabakiak hartu behar dituzte, segurtasuna gehitu eta askatasuna mugatu … Gai al ginateke bi esparru horietan gurutzatu ezin litezken marrak ezartzeko? Guretzat eta beste guztientzat izango direla jakinda gainera?