Aurrera eta atzera

Aurrerapena zer den zehaztu eta ondo finkatzea ez da batere erraza, besteak beste, batzuentzat aurrera egitea dena beste askorentzat atzerapausoa delako. Aurrerapena litzateke gehiengoaren ongizatea sendotuko duten erabakiak hartu eta proiektuak martxan jartzea. Eguneroko jarduera errazagoa bihurtuko luketen tresnak eskuratzeko aukera ematea gehiengoari. Aurrera egitea atzean utzitakoan oinarrituta, helburu berriak finkatuz. Horrela esanda, badirudi, ez dagoela zalantzarik eta guztiontzako gauza bera dela aurrerabidea, guztioi mesede egiten digula.

Egun hauetan munduko boteretsuenek urteroko hitzordua dute Suitzako Davos hirian; batzar honetan, munduak dituen erronka nagusiak dituzte aztergai. Aurten, teknologiak gure eguneroko bizitzan duen eragina izan dute aztergai, eta aditu batzuek alarma deia zabaldu dute, datozen bost urtetan teknologia, eta, batez ere, robotizazioaren ondorioz, industria alorrean 7 miloi lanpostu galduko direlako.

Californiako Silicon Valleyn ikerketa, teknologia, aurrerapena, hobekuntza … hitz magiko eta sakratuak dira. Munduko gazte prestatuenak mundu hobe baten bila omen dabiltza etengabeko berrikuntzaren bidez. Handik atera dira azken urtetako teknologia tresna bikainenak, mundua goitik behera aldatzen ari direnak, baina Silicon Valleyn sortutako oro bikaina al da? Zer esan dakioke 50 urteko langileari, gazte hauek asmatutako robotak lana berak baino hobeto eta merkeago egiten duelako lanik gabe geratzen denean, birziklatzeko aukera txikiena ez badu ere?

Horrelako kezkak azaldu dituen jendeari aurrerabideen aurka egotea leporatu izan zaio beti, atzerakoia izatea historiaren bidean oztopoak jartzeagatik. Baina, oraingo honetan, kezka eta zalantzak erakutsi dituztenak munduko boteretsuenak eta aberatsenak dira, berez horrelako aurrerapenen alde egon beharko luketenak beraien mesedetarako direlako.

Horietako batzuk Davosen galdetu dute nola orekatuko diren lanpostu galera horiek, non sortuko diren lanpostu berriak langile hauei eta atzetik datozenei lana emateko, nola lortuko ditugun gizarte orekatuak gero eta gehiago badira baztertuta geratzen direnak, kontsumitzeko aukerarik gabe eta ondorioz ekonomiari hauspoa emateko modurik gabe daudenak etengabe ugaritzen ari badira. Aurrerapenaren alde dauden hauek sarri aurrerapen hori bidegabea bada ere, kezka erakutsi dute gizakia zorionez edo zoritxarez taldean bizi den izakia delako eta norbera egoera bikainean egon arren nekez biziko delako ondo inguruan pobrezia, ezina eta haserrea besterik ez baditu. Aurrerapena, hala ere, etenik gabeko aurrerabidea da.