Futbol kontuak

Historian zehar, batzuetan urte gutxiren buruan, hitzen esanahia aldatu egiten da. Garai batean erabat onartuta zegoena, debeku zorrotzena bilaka liteke denbora gutxian. Esanahi eta edukiez gain, gure pentsaera, eta batez ere egoera eta gertakizunekiko jarrerak mutur batetik bestera joan litezke, itxuraz eragile garbirik tartean izan gabe.

Ideologiak gizartearen norabideak aldatzeko lematzat genituenean, gizakion arreta desbidera zezaken oro kaltegarria zen, hitzetik hortzera erabiltzen genuen esaldia zen, erlijioa herriaren opioa zela, jende inozoena bere benetako borroka eta interesetatik aldendu zezakeen tramankulua. Gero ohartu ginen opioa, droga oro har, ez zela beti kaltegarria, oinazeak arindu eta barruak lasaitzeko erabil zitekeela.

Futbolak zale asko du, baina gutxi dira jendaurrean alde hitz egiteko prest daudenak, ondorioz, ohikoagoa da futbolaren kontrako iritziak, irainak eta mespretxu komentarioak entzun eta irakurtzea. Indiako ipuin ezagunaren gisa, sei itsu jakintsu jar genitzake elefante baten inguruan, bakoitzak iritzi ezberdina emango digu parean duenari buruz, ukitzen duen animali zatiaren arabera.

Futbolak dirutza ikaragarriak mugitzen ditu, ustelkeriak goreneko erakundeak harrapatu eta kutsatu ditu. Futbolari asko eta asko bazterrak lotsatzeko modukoak dira. Zale gehienek, zaletasuna erakusten dutenean portaera penagarrienak gogorarazten dizkigute. Futbola, eta futbol erakundeak pribatuak dira, irmo babesten dituzte euren eskumenak eta eskubideak. Sortzen duten dirua esku eta talde pribatuetara doa beti. Baina futbola ezinezkoa litzateke gaur egun erakundeen eta alor publikoaren parte hartzerik gabe. Futbol-zelai asko diru publikoz eraikita daude, azpiegitura guztia sustapen sailek egindakoa da, segurtasuna, guztion artean ordaindutakoa, baita garraio gehiena ere.

Baina futbola kirol demokratikoena ere bada, potoa edo jertseaz egindako fardela eta lau harri nahikoak dira partida antolatzeko. Edozeinek joka lezake, ez baitira baldintza bereziak eskatzen. Ikuskizun aparta da, gainera, hura gustukoa duenarentzat. Mundu guztiak uste du badakiela kirolaz, jokoaz eta antolaketaz. Ia mugagabe hitz egiteko aukera ematen digu… Eta garrantzitsuena, opio bikaina dela, eguneroko arazo, estutasun, ondoez eta haserre guztietatik aldendu eta burua kontu askoz atseginagoz betetzen digu, batzuetan guzti hori aitortzeak lotsa ematen badigu ere.