Gu eta besteak

Aste honetan Nazio Batuen Batzar Nagusian garrantzi berezia duten bi erabaki hartu dituzte: errefuxiatuei buruzko mundu hitzarmena onartu eta migrazioen akordioa berretsi dute. Bietan zentzuzko egitasmoak betetzeko konpromisoak hartu dituzte sinatzaileek.

Adostutakoa loteslea ez izan arren, hainbat gobernuk ez dute sinatu nahi izan, besteak beste, AEBk eta Europako zenbaitek.

Horien iritziz, onartutakoak etorkinak eta errefuxiatuak deitu edota erakarri egingo ditu. Horrez gain, estatuen subiranotasuna kolokan jarriko luke. Hori diote, adibidez, mendetan herri eta gizatalde ugari euren lurretatik igarotzen edo bertan finkatzen ikusi dituzten Europako herrialdeek eta mundu guztiko gizakiz osatutako gizarte nahasienaren agintariek…

Migrazioari eman beharreko erantzuna Europar Batasunak gaur egun duen zatiketa eragile indartsuena bihurtu da. Arazo konponezina, erakundearen etorkizuna bera arriskuan jar lezakeena. Gizakia gizaki denetik mugitu egin da, arriskutik ihesi egiteko edo lur hobearen bila. Hala izan ez balitz, oraindik Afrikan egongo ginateke. Guztiok afrikarrak gara, guztiok etorkinak gara edo etorkinen ondorengoak, gizakiok ez baikara lurretik sortzen.

Aste honetan, berriz, Luigi Luca Cavalli-Sforza biologo eta genetista ospetsua hil da. Cavallik 96 urte zeuzkan eta ikerketa lan handia egin zuen giza garapenaz.

Demografia, arkeologia, hizkuntzak, antropologia, abizenak, genetikaren eragina gizakien harremanetan… Guztietan benetako jakintsua zen.

Haren tesi nagusia da giza arrazek ez dutela inongo oinarri zientifikorik, enbor bereko adarrak garela eta bereizten gaituena azalekoa dela, eguraldi baldintzetara egokitu beharrak eragindako aldaketak, baina beti ere talde bereko berezitasunak.

Gizakion joan-etorriak beti izan dira gatazka eragile, orain dela 60 bat mila urte lehen homo sapiensak Afrikatik irten baino lehenagotik, erdi tximu, erdi gizaki ziren haiek egunerokoa beste taldeekiko borrokan lortu behar izan zutenetik.

Tokiak eta baliabideak mugatuak dira leku guztietan, ez dagoena ezin da banatu eta utopia antzua litzateke kontrakoa esatea. Baina ezberdintasunak behin eta berriz azpimarratzeak, adostasun-eza nabarmentzeak, gu eta haiek hitzetik hortzera erabiltzeak urritasuna, pobrezia eta zekenkeria besterik ez dakartzate.

Europa eta Amerikako Estatu Batuak gizakion izaera eta ezaugarri ororen arragoa izan dira mugak jartzen hasi aurretik, horrek aberastu gaitu eta gaur garena onbihurtu.