Gertatu gabeak

Amaitzear dugun urtean, gogoangarri izan gabe oroitzapenen kutxan sartzea merezi duten gertakizunen zerrenda egingo bagenu nagusietan ados jarriko ginateke seguruenera. Baina iragana aztertzerakoan, batzuetan merezi du gertatutakoen beste aldea ikusteko ahalegina egitea. Ukronia, jazotakoaren baldintzak aldatuta eraiki daiteken hipotesia ez da ariketa egokia izaten, gehienetan melankoliara bultzatzen gaituelako, galdutako aukeren tristurara, baina zenbaitetan gertatu ez diren horien zergatia erakusten digu.

Ingurumena, klima aldaketa izan dugu ia egunero hizpide eta kezka iturri. Munduko boteretsuenak elkartu dira, etorkizuna erabat baldintzatuko duen arazoaz hitz egiteko. Egoeraren larritasuna aitortu arren, inork ez du onartu urtetako jarduerak ekarri gaituela honaino, buru politiko bakarra ez da ausartu bere herritarrei eta boto emaileei, egindakoa ordaindu beharra dagoela adierazi eta eskatzen, guztiek erabakiak eta konpromisoak atzeratu dituzte gogorregia delako errealitateari aurre egitea, orain artekoa amaitu dela aldarrikatzea. 

Mundu guztiko kaleak emakumez bete dira azken hilabetetan, berdintasuna, parekotasuna, eskubideak eta benetako aukerak eskatzeko. Hitzetan eta mezuetan ados gaude guztiok, baina zer eta nola egin finkatzerakoan bat etortzea ezinezkoa zaigu. Aurreiritzi sakonak, eredu ezak eta ausardia faltak galarazten digute, ez horrenbeste zerbait egitea, eraginkorra izango den bidea finkatzea baizik. Irizpide ezberdintasunak, auzi honetan paralisia dakar, eta berriro ere ezin izan dugu errebindikazioen muga gainditu.

Europar Batasuna hautsi egin da Abenduaren 12an. Britainiarrek 2016ko referendumean erabakitakoa berretsi dute. Erresuma Batuan lehia irabazi dutenek gezurra erabili dute inongo lotsarik gabe euren helburuak lortzeko, ondoren adierazitakoa sekula ez dela beteko egiaztatu arren ez dute zuzenketarik egin, eta herritar gehienek ontzat eman dute portaera hori. Europatik inor ez da ausartu esatera, 1973an Elkartera bildu zirenetik politiko britainiarren jokaera Europar Batasunarekiko lotsagarria eta onartezina izan dela, Bruselari leporatu diotelako gaitz guztien erantzukizuna, eta orain gertatu dena, historia triste eta harrigarriaren ezinbesteko ondorio dela. Bakea emango digute, baina aurretik, bitartean eta ondoren adarra behin eta berriz jo ondoren. 

Estatu Batuetan “izendaezinak” bere bide harrigarriari eutsi dio,baina itxuraz gero eta estatubatuar gehiagoren oniritziaz. Orain dela urte batzuk pentsaezina litzateke horrelako pertsona Munduko boteretsuena izan zitekeela, baina ezin dugu ahaztu herritarrek aukeratu dutela. Hemen ere ukronia erabili genezake, baina zoritxarrez beste baten bat bere lekuan izanda, ez dirudi mundua oso ezberdina izango zenik.