Arrakastaren hondamendia

Batzuetan, hala ere, Epiroko Pirro erregeari gertatutakoa gerta dakiguke, borroka irabazi bai, baina galera hain handiak izanda, garaipenak hondamendiaren atarian jartzen gaituela, erabat ahulduta hurrengo erronkari aurre egiteko.

Gizakia gizaki denetik, heriotza saihestea izan du amets, eta hori ezean bere etorrera ahalik eta gehien atzeratu. Azken hamarkadetan, ahalegin honetan lorpen ikusgarriak izan ditugu, gaur egun normaltzat jotzen dugu laurogei urte gainditzea, hortik gora baitago bizi-itxaropena Europako herri gehienetan Baina, batzuen bizia neurri gabe luzatzen den bitartean, jaiotza tasak behera egin du nabarmen, gaur egun Europan populazio kopuruari eusteko beharko genituzkeen bi haur emakumeko ez dugu betetzen, oso urruti gaude horretatik, eta ondorioz, bertako populazioa jaisten ari da eta kanpotarren etorrerak bakarrik oreka lezake galera.

Baina bizia luzatzeak gero eta eragozpen handiagoak ditu. Gaur egun, Europar Batasunean 511 miloi pertsona bizi gara, bostenak 65 urte baino gehiago du, baina 30 urte barru 80 urtetik gorakoak % 11 izango dira, 60 milioi, eta hirutik batek 65 urte baino gehiago izango du. Gazteak zaharrak baino gutxiago izango dira eta ezingo dituzte hauek zaindu eta hauen beharrak ase. Osasun gastua neurri gabe handituko da eta ez da dirurik izango pentsioak ordaintzeko. Baina horrez gain, zahartutako gizarteak berritzeko eta berrikuntzak eragiteko ahalmena galtzen du.

Adituek gero eta gehiagotan aipatzen dute “suizidio demografikoa”, ingurumenari begira gaudela diote, larriagoa den arazoa alboratzen ari garela, Europak eta Mundu guztiak duen arazo larriena hau baita.

Hain handia den populazioaren hazkundeari nola aurre egin dakion ez dute garbi adierazten adituek, hemen ere arrakastak arazo handiagoak sor litzakeelako. Horren adibide nagusia Txinako seme-alaba bakarraren politika izan da; gaur egun, Txina beste edozein lurralde baino azkarrago zahartzen ari da eta haur bakarraren erabakia arazo handiak sortzen ari da.

Egoerari aurre egiteko modu bat izan liteke populazioa orekatzea, gazte asko dauden lekuetatik odol berria behar duten lurretara jendea mugitu. Baina gobernuek, baita gaia ikertu dutenek ere, aitortu dute horrelako mugimenduek zailtasunak sortzen dituztela, batez ere, etorkinak jende heldua direnean, gizarteratzea zailagoa delako eta sortu ohi diren gatazkak zailak konpontzeko.

Gizateriak, historian zehar izan duen desafio handiena du seguruenera, asmatu beharko baitu inoiz izandako bide arrakastatsuena nola eten amildegira eraman ez dezan.