Beldurraren beldurra

Arrazoia omen da gizaki egiten gaituena, baina itxuraz une garrantzitsuetan, historiaren pasarte gogoangarriak idazten direnean, grina, desioa, beldurra, pasioa azken finean, nagusitzen da. Ongizatea berriz orekan ei dago, barne indarrak arrazoia suntsitu gabe atsedenerako aukera ematen digunean.

Baina guzti hauek hitzak besterik ez dira, egoera larrietan izuak arrazoia itsutzen duelako. Informazio gehien dugun garaian bizi gara, zalantzaren bat dugunean Internetera jotzen dugu iluntasuna argitu diezagun, bitartekaririk gabe jakin nahi dugu zer den egia eta zer gezurra. Agian horrexegatik, gero eta gehiago kostatzen zaigu zuzena eta okerra bereiztea, datu pilaketak mesfidantza dakar, eta nahasmenak beldurra.

Erabat sinesgaitza da Txinan sortutako gaitzak eragin duen hondamendia. Adituek, ikerlariek, Osasunaren Nazioarteko erakundeek mezu zehatzak eta gehienetan lasaigarriak zabaldu dituzte. Gaitzaren hilkortasun-tasa txikia da, kutsadura gehienak Wuhan hirian eta inguruan gertatu dira. Hildako gehienek, ia guztiek, lehendik beste gaitzen bat zuten. Pertsona osasuntsuek ez dute aparteko arazorik izan behar gaitza iristen bazaie, gainditzeko. Txinatik kanpo ez dago inongo kezkarik, are gutxiago Europan, ez delako ia inor kutsatu eta gaixotu direnak eragozpenik gabe sendatu direlako. Alferrik.

Kongoko Errepublika Demokratikoan 3.000 pertsona hil ditu elgorriak, baina horrek ez gaitu kezkatu, gehienok ez dugu horren berri izan. Txinan 1.400 miloi biztanle izanik hildako kopurua txikia dela behin eta berriz esateak ez du inongo eraginik, ezta gripeak urtero jende gehiago hiltzen duela hemen, adierazteak ere. Erabaki dugu gaitza arriskutsua dela eta jatetxe txinatarretara joateari utzi diogu, Txinatik iritsitako guztia susmagarri bihurtu zaigu, txinatarrak beraiek ere errudunen taldean sartu, eta inongo beharrik gabe aurpegia babesteko maskara guztiak agortu ditugu.

Behi eroen gaitza zabaldu zenean okela kontsumoa asko jeitsi zen, gizakiarentzako arriskurik ez bazegoen ere. Hegazti gripeak min handia egin zien oilasko okelaren ekoizle eta saltzaileei. Txertoak dira gaitzen kontra egin dugun aurkikuntza handiena eta bikainena, hala ere jende askok uste du kaltegarriak direla, seme-alabak eta haien inguruan dauden guztiak arriskuan jartzeko ez dute eragozpenik izaten.

Gezurrak eta albiste faltsuak, benetakoak baino errazago sinisten ditugu itxuraz, izua eta ezinegona lasaitasuna eta oreka baino atseginagoak bailiran. Beldurra libre omen da, baina beldur horrek muga gabe, eta batez ere arrazoirik gabe zabaltzen denean neurri gabeko kaltea eragiteaz gain, batez ere guztion askatasuna urratzen du.