Norabideen zalantzak

Ohiturek eta egunerokotasunak erakusten dizkigute gure bidearen mugak, marra gaindiezinak. Sakoneko aldaketak egiteko urteak, belaunaldiak eta, batez ere, ziurtasuna behar izan ohi dugu.

Orain, berriz, ustekabean eta bat batean, sendoa eta iraunkorra omen zen guztia hankaz gora geratu zaigu, inolaz ere espero ez genuen astinduaren ondorioz. Egun gutxitan onartu eta egokitu behar izan dugu sekula ezagutu gabeko egoeratara, itxialdi amaigabeetara, elkarbizitzaren alor eta une harrigarrienetara. Eta, gainera, esan digute hemendik aurrera ezer ez dela berdin izango, betikoak iruditzen zitzaizkigun portaerek eta jokaerek ez dutela balio, begiratzeko, ukitzeko, ibiltzeko, hitz egiteko, usaintzeko erak beste batzuk izango direla hemendik aurrera.

Gizakiok jainkoak eta erlijioak sortu omen genituen heriotzaz jabetu ginenean, hilkorrak ginela egiaztatu genuenean. Berriro ere, herioak aurpegia erakutsi digu eta edozer gauza egiteko prest gaude beste alde batera begira dezan, gugan begiak jarri ez ditzan. Agintariek, adituek, sendagileek diote zomorro ikusezina oso kutsakorra dela, ondorioz, besteekiko harremanetan orain artekoak ez duela balio.

Ezingo ditugu ukitu. Musua iraganeko gertutasun adierazpena bihurtu da, orain bestearengandik urruti kokatu beharra dugu. Ez dakigu nola erakarri ahal izango ditugun besteak segurtasun tarteak urratu gabe. Sexu harremanak oso arriskutsuak bihurtu omen dira, are gehiago bestearen osasun partea ezagutzen ez badugu. Alde batetik bestera mugitzea nekezagoa izango da, benetako arrazoiak izan beharko ditugu, eta, beti ere, baldintza zorrotzen pean egin beharko ditugu gure joan etorriak. Agintariek, eta ez bakarrik osasun arlokoek, une oro gure berri izan beharko dute, besteentzat arriskutsu bihurtu ez gaitezen eta besteek arriskupean jarri ez gaitzaten.

Orain arte egin behar izan dugun gehiena gure borondatez onartu dugu, ontzat eman ditugu agintariek hartutako neurriak norberarentzat eta beste guztientzat egokiak iruditu zaizkigulako. Ikuskizun da, hala ere, hain denbora gutxian horrelako aldaketa handiak egin behar izateak gugan eta gizartean izango duen eragina, nola moldatuko garen bizitza guztian arrunta zena salbuespen bihurtzen denean. ”Normaltasuna” ez da itzuliko eta oraindik ez dakigu zertara ohitu beharko dugun.