Bide beretik

Gaitzak, berriz, ez du mugarik errespetatu, ez du arrazarik bereiztu, ez du aberastasunaren arabera jokatu, guztiok parekatu gaitu.

Hori egiaztatu ondoren, bazirudien portaera batzuk alda zitezkela, irizpide batzuk gaurkotuko genituela, baina berehala ohartu gara adierazpen nabarmenenak leuntzeko orduan ere, ez dugula tutik ikasi. Estatu Batuetan beltzek bigarren mailako herritar izaten segitzen dute, polizia askok uste du edozer gauza egin dakiekeela eta portaera batzuek ez dutela zigorrik izango. Horrek ez luke aparteko garrantzirik izango, leku askotako polizien pentsamoldea delako, gainean beraiek baino pentsaera baztertzaileagoa eta arrazistagoa duen presidentea ez balute. Eta bertako Auzitegi Gorenak, behin eta berriz, polizien aldeko epaiak eman ez balitu, poliziak babestu nahiean krimenak zilegi bihurtu dituztelako.

Australian egun hauetan, poliziaren gehiegikeriaren adierazle izan den gertakariak hautsak harrotu ditu. Poliziak 16 urteko mutil aborigena jipoitu du eta bertako komunikabideek herrialde honen historia gogoratu digute. Aborigen horiek orain dela 40-50 mila urte iritsi ziren Australiara, europarrak, aldiz, orain dela 250. Britaina Handitik soldaduak, marinelak eta presoak bidali zituzten;  batez ere, XVIII.mendean bertara iritsi zirenean 600 tribu aborigen eta 170 hizkuntza inguru hitzegiten zituzten, gehienak galdu egin dira.Urtetan lur haien jabe izandakoei ez zieten hiritartasuna onartu 1967 arte, ordura arte ezin zuten lur jabe izan, eta gizartearen azken mailetan dira, segregazio poloitikaren ondorioz. Gaur egun, Australiako biztanleen %3 izanik,kartzelatan dauden gazteen erdia aborigenak dira eta adineko pertsonen %35. Langabezia, alkohoilismoa eta familia indarkeria dira gaur egun nagusi Australiako aborigenen artean.

Brasilen jendea kalera irten da egun hauetan, arrazakeria eta poliziaren gehiegikeria gaitzesteko. Beltzak eta pobreak dira han baztertuak, eta gehienetan gauza bera dira Brasilgo beltz asko eta asko pobreak direlako. Koronabirusak errukirik gabe astindu du Brasil, baina horrek ez du poliziaren indarkeria urritu. Delitu gutxiago izan dira pandemiaren ondorioz, baina polizien hillketek gora egin dut; Rio de Janeiron bakarrik 290 pertsona hil dituzte polizien operazioetan azken bi hilabetetan. Iaz, berriz, 6.000 izan ziren poliziak hildako pertsonak, ustez delituen kontrako borrokan.

Zorigaitzak parekatu omen gaitu historian zehar, elkartasuna une larrienetan, gure ezina agerian geratzen denean sortzen zaigulako, baina, egun hauetan ez dirudi hori denik joera. Arauak ez dira hobetu, arautu beharrekoa goitik behera aldatu bada ere.