Lehia basatia

Koronabirusak eragindako krisia oraindik amaitu ez bada ere, ondorengoari buruzko aurreikuspenak, iritziak eta iragarpenak ugariak eta mota guztietakoak izan dira. Hainbeste eta hain ezberdinak izanik, horietariko batzuk beteko dira derrigorrez, baina ziur aski gizakion jardueran ohikoak diren kontraesanak nagusituko dira, onena eta okerrena nahastuz. 

Gaitzaren astinduak eragindako beldurraren ondorioz, Mundu guztiko ikerlariak, zientzialariak eta adituak lanean hasi ziren irtenbideen bila. Dirudienez historian zehar ez da sekula izan horrelako ahaleginik helburu bakar baten bila. Itxuraz etsai amorratuak izan direnek, arerio sutsuek edo lankide gorrotatuenek elkarrekin lan egitea onartu dute, helburuaren garrantziak eta handitasunak zentzugabeko bihurtu dituelako borroka antzu horiek. 

Gaur egun ehundik gora omen dira birusaren aurkako txertoaren bila egiten ari diren ahaleginak. Diru asko jarri dute gobernuek eta farmazeutikek, zientzialari prestatuenak gau eta egun lanean ari dira lasaitasuna eta normaltasuna itzuliko digun sendagaiaren bila. Badirudi ohartu garela gizateria osoa bat dela, hurkoaren sufrimendua gurea dela Eta birusak erakutsi digun ahuldadeak iraganeko akatsak ezabatuko dituela… Baina agian kontua beste bat da. 

Hortaz dakitenek diote txertoa arma nuklearrak baino tresna indartsuagoa bilaka litekeela lehendabizi aurkitzen duenarentzat. Eskuratzen duen herrialdeak aukera izango duela besteei baldintzak jarri eta etekin ikusgarria ateratzeko lorpenari. Itxialdiko egunetan etorkizuna asmatzen ahalegindu ziren askok zioten hobeak izango ginela, horrelako izurriteak zuzeneko eragina izango zuela gizakion portaeran, elkartasuna eta besteekiko errespetua nagusituko zirela, edo gutxienez orain arte ez bezalako garrantzia izango zutela. 

Baina krisiak sortu duen desoreka bakoitzeko egiaztatu dugu hori ez dela beteko,betiko maltzurkeria eta joko zikina direla giza jokamoldearen eragile nagusiak. Gaitzari aurre egiteko tresnak behar izan ditugunean indarra eta eragina izan dira nagusi,albokoa edo urrutikoa baino lehenago iristeko ekoizleengana.Botikaren batek eraginkortasuna erakutsi duenean, boteretsuenek ahal izan duten guztia erosi dute, kontutan hartu gabe, botika horren gabeziak beste gaixotasun batzuk dituztenengan izango duen eragina… Hori ikusita pentsa liteke zer egingo duen txertoa lortzen duen lehenak… ala ez?