Beldurra

Estatu Batuetan poliziak George Floyd gizonezko beltza hil zuenetik kaleak sutan dira. Poliziaren kontrako protestak hiri ugaritara zabaldu dira, polizia hori babesteko prest dauden milizia armatuak ugaritu, eta gatazka giroak aspaldi ezagutu gabeko itxura hartu du. Egun eta aste hauetan asko dira, gertaera hauen zergatiei buruzko azalpenak eman dituzten aditu, jakintsu eta irakasleak. Arrazoi ezberdinak, batzuk kontrajarriak entzun eta irakurri ditugu, eta seguruenik gehienak zentzudunak eta  oinarritutakoak dira. Baina urrutitik jasotzen dugun inpresioa da indarkeria askoren eragile nagusia beldurra dela.

Aurten Estatu Batuetako poliziek 750 pertsona hil dituzte atxilotzera joan direnean edo susmagarriak iruditu zaizkielako. Herena beltzak ziren, baina hilketa kopuru honek erakusten du polizia asko beldurrez bizi direla. Estatu Batuetan biztanle adina arma dago zibilen esku. Edozeinek izan lezake bat, poliziek badakite eta sarri nahiago dute errugabea zauritu edo hiltzea beraiek erortzea baino. Beldur horrek ez du inolaz ere zilegi bihurtzen polizia askoren ankerkeria, neurri gabeko indar erabilera eta bereziki beltzekiko duten amorrua.

Afganistenen eta Iraken soldadu estatubatuarrek, eta orohar bertan izan diren soldadu atzerritar gehienek neurriz kanpoko jokaerak izan dituzte. Batzuk erabat arbuiagarriak, torturak eta atxilotu ondorengo hilketak, baina beste batzuk beldurrak eragindakoak. Iraken egondako soldaduek kontatu dute edozein lekutan, edozein izan zitekeela erasotzaile. Gizonek, emakumeek eta haurrek eraman zezaketelako lehergailua soinean eta soldaduen ondoan eztanda arazi.

Azken urtetako gerra gehienak ez ohikoak dira, ez dira armadek armaden kontra egindakoak, armadek talde irregularrak eta zehaztu gabeko etsaien kontrakoak baizik. Soldaduek diote askoz beldurgarriagoak direla hauek, etsaia eta arriskua garbi identifikatuta dauden gatazkak baino.

Estatu Batuetan izua nagusitzen ari da alde guztietan. Lanpostua eta estatusa galdu litzaketelako zuri askoren artean. Gehiegitan beltza den gaizkileari. Okerretik okerragora erortzekoa beltz askoren eta etorkinen artean. Koronabirusa, krisi ekonomikoa, etorkizuna beltza eta oraina iluna… Lurrikara bortitzak astindu du, orain dela gutxi arte herrialde sendoena eta indartsuena zirudiena, horrek egiak ezabatu eta dardara zabaldu du.

Beldurrak mugitu izan du Mundua, inperio indartsuenak bota zituzten barbaro asko, beste batzuengandik ihesi zetozen bota zuten hormaren kontra talka egin zutenean.