Amaitu da jai-egunen ondoren asteazken hotz honetako abisu horia

15:00etan amaitutzat eman du Euskalmetek elurragatik ezarrita zeukan abisu horia. Elurraren maila igotzen joango da arratsaldean zehar, 1.000-1.200 metrotan kokatu arte. 21:00etan, beste abisu hori bat aktibatuko da. Kasu honetan, tenperatura minimoengatik eta izotzagatik izango da eta soilik Araban. Lurraldearen mendebaldean izotz txikia egiteko aukera egongo da.

Hamar heldu eta adingabe bat artatu behar izan ditu Osakidetzak asteazken honetan Gasteizen, izotza dela eta lurrera erortzean izandako zauriak sendatzeko. Bi jardunaldi horien artean, Osakidetzak 28 pertsona artatu ditu, horietako bost haurrak.

Aurreikuspenen arabera, ostirala eta larunbata neguko egunak izango dira berriro Nafarroan, ipar-mendebaldeko egoera klasikoarekin eta elurra 500–600 metroko kotetan agertuko da. Elurteak bereziki ugariak izango dira Nafarroako Pirinioetan, 1.200 metrotik gorako eta 50 zentimetrotik gorako elur-pilaketekin.

Nafarroako errepide sare nagusiak normaltasuna berreskuratu du elurteen ostean: hala ere, bigarren mailako lau errepidek oraindik eraginak dituzte. Hain zuzen ere, itxita dira NA-7510 San Migel Aralar, NA-2012 Otsagabia-Irati eta NA-2011 Zaraitzu-Frantzia errepideak, eta NA-137 Burgi-Izaba-Frantzia bidean neguko ekipamenduak erabiltzea derrigorrezkoa da. Nafarroako Gobernuak arreta handiz gidatzeko gomendatu du elur eta izotz arriskuagatik. Foruzaingoak, gainera, herritarren lankidetza eskatu du elur-garbiketa lanak ez oztopatzeko.

Hala ere, Planak aktibaturik jarraitzen du ”Jarraipen eta Berri-Emate egoeran”.

Gaur amaitu dira kamioien zirkulaziorako neurri bereziak Irungo AP8an, Baionako noranzkoan. Neurriak abenduaren 18an ezarri ziren, eta auto-ilara luzeak eragin izan ditu gaur arte.

Frantziako agintariek zirkulazioa mugatu dute elurra dela eta, eta Bordele eta Poitiers artean 3,5 tona baino gehiagoko kamioiak ibiltzea debekatu dute. Neurriak hainbat bide nagusiri eragiten die; besteak beste, A-10, RN147, A-83, RN-10, A-20, A-63, A-65 eta A-62 autobideei. Egoera horren aurrean, Frantziara sartzeko La Junquerako bidea hartzea gomendatzen dute.

Euskadin indarrean da abisu horia asteazken honetan, elurragatik eta hotzagatik. Barnealdean elur-prezipitazioak espero dira 15:00ak arte, 1.000–1.200 metrotik gora. Horrez gain, Arabako hainbat tokitan tenperatura oso baxuak eta izotza aurreikusten dira; izan ere, 10 ºC-tik beherakoak espero dira zenbait udalerritan. Horretan, ostegun goizera arte luzatuko da hotzagatik ezarritako abisua.

Urteko goizalderik hotzena bizi izan dugu gaur Euskal Herrian. Bereziki baxuak izan dira Nafarroako termometroek markatutakoak; izan ere, zenbait udalerritan -20ºC-tik gertukoak izan dira. Hauek dira gurean erregistratutako gutxieneko tenperaturak:

Euskadi

• -12,2ºC: Egino (Araba)
• -12,1º C: Iturrieta (Araba)
• -9,5ºC: Agurain (Araba)
• -9.ºC: Pagoeta (Araba)
• -8,4ºC: Etura (Araba)
• -7ºC: Arkaute (Araba)
• - 6,6ºC: Berastegi (Gipuzkoa)
• -5,8ºC: Otxandio (Bizkaia)
• -5,2ºC: Urkiola (Bizkaia)
• - 4,3ºC: Aitzu (Gipuzkoa)
• - 3,1º C: Belauntza (Gipuzkoa)
• - 3. C: Mallabia (Bizkaia)
• - 2,4. C: Muxika (Bizkaia)
• - 2. C: Garai (Bizkaia)
  

Nafarroa

• -18ºC: Aurizberri Urrobi
• -17ºC: Aurizberri
• -15,6ºC: Erro
• -13,8ºC: El Ferial Larra-Belagua
• -13ºC: Auritz
• -12,5ºC: Urbasa
• -12,3ºC: Iraitzoz
• -12ºC: Eritzegoiti
• -11,8ºC: Abaurregaina 
• -11,8ºC: La Contienda Larra-Belagua
• -11,5ºC: Oskotz
• -11,1ºC: Mezkiritz

Ipar Euskal Herria

• -8,1ºC: Irati Organbide
• -7,8ºC: Urepele
• -7,2ºC: Bustintze
• -7 ºC: Donibane Garazi
• -5 ºC: Maule
• -4ºC: Bastida
• -4ºC: Baiona
•  0ºC: Hendaia

Euskadiko mendate guztiak irekita daude jada; hala ere, kontu handiz ibiltzea gomendatzen da, elurra eta izotz-plakak daudelako. Ertzaintzak jakinarazi du sare nagusia irekita dagoela berriro ere. Zenbait mendatetan kateak erabili behar dira oraindik, hala nola Artikutza, Herrera eta Opakua mendateetan. Euskalmeten arabera, gaua bereziki hotza izan da Arabako barnealdean, eta minimoak - 8,2 gradukoak izan dira Agurainen. EAEko barnealdean abisu horik jarrituko du 09:00etatik 15:00etara elurragatik, eta egunean zehar 400 eta 1.200 metro arteko elur-kota izango dugu.

Hainbat pertsona zauritu dira asteazken honetan A-15eko 89. kilometroan, Zizur Nagusian, auto-istripu batean. Ezbeharrak auto-ilarak sortu ditu, Kordobako lotunetik Landabengo lotuneraino, eta une batzuetan trafikoa erabat geldirik egon da, Foruzaingoak jakinarazi duenez. Lekura bertaratu dira polizia- eta osasun-zerbitzuak, baita kaltetutako ibilgailuak kentzeko garabiak ere, eta oraingoz ez da zaurituen egoerari buruzko xehetasunik eman.

Nafarroa ere alerta horian da asteazken honetan, bai hotzagatik, bai elurragatik; batez ere goizeko lehen orduetan. Nafarroako Pirinioetan, 24 orduan 5 zentimetro baino gehiago metatzea aurreikusten da, edozein altitudetan, eta 600-700 metrotik gora izango da eraginik handiena. Bestalde, Arabako Lautadan eta Nerbioi ibaiaren arroan, bi zentimetro pila daitezke 24 orduan 500-600 metrotik gora, Nafarroako erdialdean bezala.

Tenperatura baxuak protagonista izaten ari dira goizean euskal lurralde osoan. Honako hauek dira euskal hiriburuetako tenperaturak, goizeko 08:00etan:

• Bilbo: 5 ºC
• Gasteiz: -5ºC
• Donostia: 2ºC
• Iruñea: -4.ºC
• Baiona: 0ºC
• Donibane Garazi: -4ºC
• Maule: -2ºC

Elorrioko N-636 errepideko eskuineko erreia moztuta dago, kamioi bat matxuratu da eta. Ertzaintza bertan da trafikoa bideratzen. A-310 errepidean, istripu batek zauritu bat utzi du Gasteiztik gertu, eta garbiketa-zerbitzuak lanean ari dira. Antzuolan matxuratutako furgoneta batek gorabeherak eragin ditu AP-636 autobidean.