Gernikako Juntetxean Espainiako bandera ostu eta pintaketa bat egin dute

'Gurea ikurriña' margotu dute ezezagun batzuek gaur goizaldean Gernikako Juntetxean sartzeko eskaileretan, eta Espainiako eta Europar Batasuneko bandera ofizialak lapurtu dituzte, Bizkaiko Batzar Nagusiek jakitera eman dutenez.

Batzar Nagusietako Mahaiak (EAJ, PSE-EE eta Elkarrekin Bizkaia) "erabateko gaitzespena" adierazi du "pintaketaren eta bandera ofizialen lapurretaren aurrean", "askatasunaren, demokraziaren eta bizikidetzaren aurkako ekintzak direlako".

Bizkaiko Batzar Nagusiek ohar baten bidez salatu dutenez, "Bizkaiko herri subiranotasunaren sinboloa den eta Gernikako Arbola, Euskal Herriaren askatasunaren, demokraziaren eta bakearen ikur unibertsala hartzen duen espazioaren kontra egin dute".

"Bizkaitar guztien egoitzaren aurkako eraso honek bizikidetza baketsuaren giroa eta euskal gizarteak normalizazioaren, bakegintzaren eta giza eskubideen errespetu osoaren alde dagoen konpromiso sendoa urratzen ditu", gaineratu dute.

Era berean, "lurraldeko kultur ondarearen eta urtero milaka bisitari erakartzen dituan leku baten irudiaren kontrako erasoa" dela adierazi dute.

Bizkaiko Batzar Nagusien esanetan, "indarkeriazko ekintza bakar batek ere ez du lekurik askatasunarekin konprometitutako gizarte demokratiko eta plural batean".

EAJk EH Bilduri esan dio ezin duela erantzukizuna saihestu

EAJ kezkatuta agertu da Ernairen "indarkeria ekintzak areagotu" direlako, eta adierazi du EH Bilduk ezin duela "erantzukizuna saihestu, gazte antolakundea bere "siglen pean" ari delako jokatzen.

Ohar batean, EAJk baieztatu du ekintza horiek ez direla "gertakari isolatuak", eta erantsi du "onartezina dela horrelako erasoak normaltasun osoz burutzea", "beste garai batekoak" direla iritzita.