Dena prest 2019ko sanferminei hasiera emateko

Nafarroako hiriburua prest dago 2019ko sanferminei ongietorria emateko. Urtero bezala, uztailaren 6an Udaletxe plaza jendez gainezka egongo da, 9 eguneko jaiei hasiera ematen dien txupinazoaz gozatzeko.

Txupinazoa 12:00etan botako dute, Udaletxe plazan. Aurten, La Pamplonesa musika bandak botako du sanferminetako txupinazoa. Botoen % 92 eskuratuta irabazi zuen aurten 100 urte bete dituen bandak Iruñeko Udalak zabaldutako bozketa irabazi zuen.

Une horretatik aurrera, jaiek giroko dute Nafarroako hirigunea. Bederatzi egunez, adin guztietako herritarrentzako ekitaldiak eskainiko dituzte: antzerkiak, kontzertuak, dantzaldiak, su artifizialak, erraldoiak eta buruhandiak eta herri-kirolak, besteak beste. 2019ko sanferminetako egitarau osoa eitb.eus-en egunez egun kontsulta daiteke.

Guztira, 496 ekimen eskainiko dituzte sanferminetan, 40 kontzertu, 33 dantzaldi, 144 musika saio kalean, banden 7 kontzertu eta 49 eskualdeko musika eta dantza ekitaldi, haurrentzako ekitaldiekin batera. Aurrekontua 1,36 miloi eurokoa izan da, aurreko sanferminetakoaren antzekoa.

Sanferminak “seguru eta gizalegezkoak” izan daitezen, Polizia Nazionalaren, Guardia Zibilaren, Foruzaingoaren eta Udaltzaingoaren 2.600 agente baino gehiago arituko dira larunbatetik aurrera Iruñean eta Nafarroa osoan lanean. Dispositiboa osatzen duten 2.606 agenteen artean, 700 polizia nazional, 796 guardia zibil, 710 foruzain (horietako 300, hiriburuan) eta 400 udaltzain izango dira. Horrez gain, Babes Zibileko 160 laguntzaile ibiliko dira Iruñeko erdigunean.

Espainiako Gobernuak Nafarroan duen ordezkariak, Jose Luis Arastik, sanferminetan lan egingo duten polizia talde guztiak jarrera sexisten aurka lanean ari direla adierazi du. “Sexu askatasunaren aurkako delituengatik ere kezkatuta gaude”, esan du Arastik Iruñean zuzendu duen segurtasun-batzarrean.

Eraso sexisten kontrako neurriak

Hori dela eta, Iruñeko Udalak ‘Eraso sexistarik gabe, Iruña aske’ informazio puntua eskainiko du. Udaleko zerbitzu horretan, feminismo edota genero ikuspegiko arloetan aritutako sei profesionalek eraso sexisten aurkako informazioa emango dute, euskaraz, gaztelaniaz, ingelesez eta frantsesez.

Aurten, gainera, genero berdintasunaren aldeko 5 eta 8 urte arteko umeentzako aldizkaria diseinatu du Udalak. Bestetik, berdintasun arloko kazetaritza lan onenak nabarmenduko dituzten sariak iragarriko dituzte; horietan parte hartzeko epea uztailaren 22an bukatzen da, 14:00etan.

Osasun dispositiboak

Entzierroetako osasun-laguntzari dagokionez, guztira hamazazpi postu egongo dira, bederatzi hesian eta zortzi sorosleekin, zezen-plazako erizaintza eta ibilbidean zehar dauden hamabost anbulantziarekin batera. Horrela, sorospen postu bat egongo da 50 metrotik 50 metrora.

Bestetik, 350 boluntariok osatuko dute Gurutze Gorriak sanferminetarako osatu duen taldea. Gurutze Gorriko zerbitzuan parte hartuko duten boluntarioak jaiek iraungo duten 228 orduetan zehar txandakatzen joango dira.

Nafarroako Gobernuko Osasun kontseilariak, Fernando Dominguezek, osasun-baliabideak aprobetxatzea eta Nafarroako Ospitaleguneko larrialdi zerbitzuetara "benetako kasu larrietan" bakarrik joatea gomendatu du, sorospen gehienak aipatutako osasun-zentroetan egin baitaitezke.

Trafikoa

Sanferminetan, Iruñeko erdigunea zirkulaziorako itxiko dute uztailaren 5etik 15era (hilaren 08:00etatik 15eko 14:00etara). Horrez gain, uztailaren 5etik 14era (biak barne), aparkatzeko eremu laranja ezarriko dute hiri osoan.

Egun eguzkitsua txupinazo egunean

AEMETen arabera, txupinazo eguneko tenperatura altuena 32 gradukoa izango da, eta baxuena, aldiz, 16 gradukoa. Zehazki, 12:00etan 27 gradu izango dira, eta eguna eguzkitsua izango da 14:00ak arte. Arratsaldean, eguraldia hodeitsuagoa izango da, baina ez du euririk egingo.

Sanferminak zuzenean jarraitu

Ezin bazara Iruñera joan, uztailaren 6an sanferminei hasiera emango dien txupinazoa eitb.eus-en zuzenean ikusteko aukera izango da, 12:00etan. ETB1ek eta eitb.eus-ek 11:00etan egingo dute bat Iruñeko Udaletxe plazarekin, ekitaldia zuzenean eskaintzeko.

Gainera, eitb.eus-ek sanferminetarako prestatu duen atari berezian, entzierroekin eta ospakizunekin lotutako informazioa ikusteko aukera izango da. Jaietako argazkiak, emankizunak, albisteak eta bideoak izango dira bertan.

Era berean, ETB1ek eta eitb.eus-ek San Fermin jaiak agurtuko dituen 'Gaixoa Ni' ekitaldia zuzenean eskainiko dute uztailaren 14an.