Haiek eta gu

Gizakia gizaki denetik lur eta aukera hobeen bila mugitu da, batzuetan iritsitako lekuetan lehenago heldutakoak aurkitu ditu, beste zenbaitetan aitzindari izan da eta eragozpenik gabe eremu berriez jabetu ohi da. Joan-etorri horiek beti istiluak eta gatazkak eragin dituzte, jatorrizko biztanleak eta iritsi berrien arteko lehiak eta borrokek gure historiaren atal nagusia osatzen dute.

Gaur egun inoiz baino jende gehiago bizi da bere sorterritik kanpo, hartzaileok galbahe zorrotzak asmatzen ditugu onar ditzakegunak eta eskubide hori ez dutenak bereizteko. Errefuxiatuek asiloa eta babesa eska dezakete, etorkin hutsak direnek aldiz mugak, ateak eta bulegoak itxita dituzte. Familiaren bizimodua hobetu eta seme-alabei etorkizun duinagoa eskaintzeko bizia arriskuan jartzeko prest daudenak ez dute gure errespetua merezi. Zer esanik ez aukeren bila datozenek, gure lanpostua eta etxebizitza arriskuan jar lezaketenek, horiek gure gorroto eta amorrua pizten dituzte.

Migrazioak gaur egungo arazo eta eztabaiden gune dira, gabezia, buruhauste eta behar guztiak laburbiltzen dituztelako. Beharrak eragindako jendearen mugimenduak politikaren ardatz bihurtu dira mendebaldean, jarrera itxi eta atzerakoienak suspertu dituzte, alderdi eta pertsonai bitxi, harrigarri eta beldurgarrienak buruzagi bihurtu. Gizartean, alderdietan eta gobernuen arteko harremanetan zatiketa eta konponezina zabaldu dituzte… Ez dakigu kanpotik iritsitakoa noiz bihurtzen den bertako. Zeinek eta zergatik eman lezakeen horretarako baimena eta oniritzia. Baina guztiok gara atzerritarrak, gu edo gure arbasoak nonbaitetik iritsi ziren, etorkin izan ziren noizbait.

Eta orain, herrialde hartzaileok kanpotarrak behar ditugu, zahartzen, indarrik gabe geratzen ari den gizarteak jende gaztea behar baitu, jaioterria usteko ausardia duten pertsonak, gureak omen diren lurralde hauek etorkizuna izan dezaten. Immigranterik gabe gureak egin du. Jakin badakigu ateak ireki eta erakartzeko deiadarrak ez lukeela ezer konponduko, arazo gehiago sortuko lituzkeela, baina Europar Batasunak hartu duen jarrerak arrisku handia du, gure buruaz beste egiteko zorian jartzen gaituelako.

Talde eta herri ezberdinetako gizakien arteko harremanak beti dira gaitzak eta neketsuak, baina gaur egun hauxe da dugun erronka nagusia, nola uztartu gure beharrak eta "kanpotarren" itxaropena, gure gizarte egiturak hautsi gabe eta beraiengan etsipen mingarria eragin gabe. Mugetan hesiak eraikita gizatasuna galdu besterik ez dugu egiten. Eta Nazio Batuek argitaratutako azken txostenak dio errefuxiatu eta etorkin gehienak herrialde pobreenetan lortu dutela babesa eta lana, eta ez mendebaldean. Era berean Angela Merkelek 2015an egindakoa goraipatu dute, iritzi guztien aurka ausardia izan zuelako mugak irekitzeko.