Ziurtasun beharra

Beste kontu batzuei buruz aritzea arinkeria al da?

Ziurgabetasunak jaten gaituen garai berezi hauetan noraezean gabiltza,iraunkorra zirudien guztia erortzeko zorian sentitzen dugulako. Gizakiok antolatutako egunerokotasuna behar omen dugu, galdera eta kezka nagusien erantzunak, galduta gaudenean iparra adieraziko digun baten bat. Eta orain badirudi guzti horren faltan gaudela. Etxean egoteko agindua eman digute, horrek edozein ekimen galarazten du, kezkak eta beldurrak astintzea ekidin eta etorkizuna iluntasunez betetzen digu.

Gertu egon arren oso urrutikoak diruditen garaiak etsipenez oroitzen ditugu, kalera irteteko eragozpenik ez genuenean, goizean kafea hartu genezakeenean inori baimena eskatu gabe, zakur jabeak inbidiaz eta gorrotoz begiratzen ez genitueneko egun itxuraz zoriontsuak. Filosofoek, soziologoek eta giza zientziatan adituek diote mundu bat amaitu dela, datorkiguna erabat ezberdina izango dela, baina inor ez da ausartzen iragan hori zehazten, eta hasten direnean bakoitzak era ezberdinean azaltzen digu ustez izango den hori.

Ez dakigu zer datorren, galeraren atsekabeak ezinezko bihurtzen digu zerbait irudikatzeko ahalegina, baina agian konponbidea  oso gertukoak diren antzinako garai horietan aurki genezake. Esan ohi da zerbaiten balioaz ohartzen garela galtzen dugunean. Oraingo honetan oinarrizkoak diren askatasunak eta aukerak galdu ditugu, ez dakigu gainera ondoren, nolakoa izango den errealitate berri hori.

Mundua goitik behera alda liteke, baina kontu batzuk garai, krisi eta larrialdien aurrekoak dira eta gainetik daude, baina egunero izan ditugunean berezkoak zirela iruditu zaigu, ginenak ginelako zegozkigula. Orain egiaztatu dugu ez dela horrela, oinarrizkoena galdu dezakegula, ezer ez dela betirako … Garai ilun hauek ere amaituko dira. Ez dakigu zeri hasera emateko, baina bide berriak irekiko zaizkigu, eta agian ez genuke ahaztu behar gizaki ahulak besterik ez garela, mugatuak eta oso egoera gutxitan baten batentzat ezinbestekoak.

Hitz eta adierazpen harrigarriak ere entzun ditugu egun hauetan, buru politikoek eta ekonomiaren arduradunek orain hilabete pentsaezinak ziruditen kontuak aitortu dituzte, politikaren eta ekonomiaren sakoneko oinarriak ezbaian jarri dituzte. Gizakion berdintasuna eta elkartasunaren beharra ere gogoratu dute, guztion garrantzia eta lankidetzaren handitasuna … Agian guzti horiek ere ez genituzke ahantzi behar ekaitza baretu ondoren.