Datorkiguna

Uste genuen krisiak hobeak egingo gintuela. Pentsatzen genuen hain astindu larriak hausnarketarako aukera emango zigula, eguneroko abiada eroak galarazten digun gure buruaren azterketa sakonagoa egingo genuela, okerrak zuzendu eta gaizki egindakoak eraberritzeko.

Oraindik ez da izurritea amaitu, hasi besterik ez dela egin esaten digute adituek, baina egiaztatu dugu aldaketak itxaron beharko duela. Lau hormen arteko itxialdiak zerumugak ezabatu dizkigu, oso urruti ikusteko aukera galarazi. Baina, garai berri hauetan jarduera eten ez dutenek, eta, batez ere, gizartearen irizpideak finkatu eta bide berriak urratu beharko lituzketenek erakutsi digute  lehengo lepotik dugula burua.

Nazioarteko erakundeek, gaitzetan adituek, gizartearen nondik norakoak ikertzen dituztenek diote birusa munduko bazter guztietara iritsi dela, zerupean garen guztiok garela biktima eta, behingoz, elkartuta aurre egin beharko diogula menderatu nahi badugu. Baina gure ordezkariek, ustez gure asmoak eta helburuak jaso eta bideratu beharko lituzketenek, erabaki dute sakonean ez dela ezer aldatu. Guztia zilegi dela eragina indartu eta boterea ahultzeko. Trikimailuak baliagarriak direla, oraingoan ere, hildakoak milaka, kaltetuak milioika eta atsekabetuak gizaki oro badira ere.

Jokaera maltzurrenak, portaera zitalenak, aldarrikapen mespretxagarrienak nagusitzen ari dira … Hemen, haratago eta gure mugetatik urruti. "Gu eta haiek",  laguna eta etsaia, gurea eta besteena, iparra eta hegoa, hemengoak eta kanpokoak … Hizkuntza zaharkituena, milaka bider erabilitako hitzak, jokaera lotsagarrienak hortxe dira, gaitzari aurre egiteko ahalegin larrienen erdian. Orain ere, guztiak balio omen du, gezurrak zabaltzea gobernuen lana gutxiesteko. Etekin handiena lortzea, hil ala biziko garrantzia duen tresneria saldu eta erosterakoan. Besteei laguntza ukatzea “gureak” haserretu litezkeelako. Gertatzen ari dena ukatzea, komeni zaigulako …

Ezer ez dela berdin izango diote, behin eta berriz, egun hauetan iritzia ematen ausartzen direnek. Guk ez dakigu bihar zer gertatuko den, baina gaur gehiena bertsua da. Baina, litekeena da amesgaiztoa amaitu eta esnatzen garenean, egun hauetan zer diren eta nor ordezkatzen duten jakin ez dutenek ustekabekoa hartzea. Orain, guztia aurretik eramango duela dirudien olatuak, beraiek bete betean harrapatzea itxuraz barealdia iristen denean, eta egun hauetan zer gertatu den lasaiago gogoratzen eta aztertzen hasten gerenean. Baliteke, baina, zoritxarrez itxura guztien arabera, gaurko nazkagarri hauek aulki berdinetan eserita ikusiko ditugu bihar ere.