Erreferendum erabakigarria

Edozein herrialdetan, agintean izan den goi ordezkari politikoak berriro hauteskundeetara bere burua aurkeztea erabakiz gero, hautagai ezberdinen arteko lehia izan arren, berari buruzko, bere lanari buruzko bozketa bihurtzen dira hauteskundeak. Zer esanik ez ordezkaritza gorena bada, eta hautagaiak bere agintaldian polemika eta eztabaida ugari sortu baditu. Baina datorren astean Estatu Batuetan egingo dena, hori baino gehiago izango da.

Donald Trumpek mundua bitan banatu du: bera eta beste guztia. Alderdi Errepublikanoa ezerezean amildu da, presidenteak irentsi egin du. Ez dakigu zein den bere programa, zer eskaintzen dien herritarrei. Hautagaien artean ez da apenas ideia lehiarik izan ,boto emaileak ez du entzun zer egingo duen eta zer ez duen egingo batak edo besteak garaile badira. Eta ziur aski ez du axola.

Politikoei sarri leporatu izan zaie dagoena kendu nahi izatea beraiek jartzeko, ideiak eta plangintzak alde batera utzita. Esan ohi da pertsonak ez duela horrenbeste axola, egin nahi duenak edo egin lezakeenak baizik. Baina oraingo honetan hori ere aldatu da, aldekoek agintean segi dezala nahi dute, ez zaie apenas axola zer egin duen edo zer egin lezakeen, denagatik emango diote botoa, “beti agindu dutenei” aurre egiten dielako. Aurkakoek paretik kendu nahi dute, beste hautagaia zein den edo ze programa daraman bigarren mailako kontua da, ia edozeini emango liokete botoa Trumpen aroa amaitu dadin.

Clausewitzek zion gerra politikaren jarraipena dela baina beste baliabide batzuk erabilita. Orain arte, Trumpek erakutsi digu politika gerra dela, oraindik zuzenean armak erabili ez baditu ere. Ez dakigu zer gertatuko den datorren asteko bozketan, baina Trumpek neurri batean behintzat irabazi duela esan genezake. Edozer gauza egin arren milioika estatubatuar botoa emateko prest direlako, mundu guztian jarraitzaile eta miresle asko duelako. Joko zikina, gezurra, errespetu falta eta iraina normalak eta zilegi bihurtu dituelako .Zuria eta beltzaren arteko hautaketa egitera behartu gaituelako eta errealitate hori ontzat eman dugulako.

Joe Bidenen iragan politikoak ez digu itxaropen handirik sortzen, Alderdi Demokratak sarriegi erakutsi du goi taldeen eta eliteen alderdia dela. Hauteskunde kanpaina, hauek ere kontran egin dute, ezezkoari eta ukazioari lehentasuna emanez, herritarrak aukeratu behar dutena bereizteko gai ez balira legez. Hala ere, azaroko lehen astelehenaren ondorengo lehen asteartea erreferendum hutsa bilakatu da, guztia zikindu duen kutsadura garbitzeko ezinbesteko erabakia. Gero gerokoak.