Trumpek iragarri du % 25etik % 50era igoko dituela altzairuaren muga-zergak

Donald Trump AEBko presidenteak iragarri du altzairuaren inportazioari martxoan ezarritako % 25eko muga-zerga bikoiztu egingo duela, eta % 50ekoa izango dela.

"Altzairuaren gaineko muga-zerga % 25etik % 50era igo behar dugu AEBn, herrialdeko industria are gehiago ziurtatzeko", jakinarazi du agintariak Pittsburghen (Pennsylvania) US Steelek duen lantegi batean emandako hitzaldian.

Buruzagi errepublikanoak altzairuaren industriako langileen aurrean azpimarratu duenez, publiko horrek "hobeto ulertzen du muga-zerga kontzeptua Wall Streeteko jendeak baino", eta nabarmendu du "muga-zerga" dela bere laugarren hitz gogokoena, "jainkoa, emaztea eta familia"ren atzetik.

Presidentearen arabera, hasieran muga-zerga hori % 40koa izatea pentsatu zuen, baina industriako arduradunek % 50era igotzeko eskatu zioten.

Nazioarteko Merkataritza Auzitegiak inportazioei ezarritako muga-zerga orokorra blokeatu ostean Apelazio Auzitegiak berriro atea ireki eta biharamunean egin du Trumpek iragarpena. Hala ere, Merkataritza Auzitegiaren erabakiak ez zion altzairuaren gaineko zergari eragiten, baizik eta apirilaren 2an mundu osoko ia herrialde guztiei jarritako oinarrizko % 10eko muga-zergari.

Muskek Etxe Zuria utzi du, murrizketa ugari egin ostean, baina Trumpen aholkulari izaten jarraituko du

Pittsburghen egindako ekitaldia Nippon Steel altzairugintza enpresa japoniarrak eta US Steel estatubatuarrak maiatzaren 23an egindako ituna goraipatzeko baliatu AEBko presidenteak.

Egun hartan, Trumpek esan zuen urtarrilaren 3an akordioa eten egin zuela Joe Biden orduko presidenteak, herrialdeari 70.000 lanposturen sorrera eta 14.000 milioi dolarreko ekarpena egingo bazion ere.

Trumpek, Bidenen erabakia iritsi aurretik, esan zuen operazioaren aurka zegoela, baina Etxe Zurira itzuli eta otsailean Shigeru Ishiba Japoniako lehen ministroarekin bildu ostean, Nippon Steelek gainbeheran den enpresa estatubatuarrean parte hartzearen alde agertu zen.

Ostiral honetan, presidenteak esan du aliantza horrek "enpresa amerikar historiko horrek estatubatuarra izaten jarraitzea" bermatuko duela, eta Japonia "lagun handia" izan dela bera agintean egon denean.

"Industria siderurgiko indartsua edukitzea ez da duintasun, oparotasun eta harrotasun kontu hutsa. Segurtasun nazionala da bereziki", gaineratu du.