EiTB Focus: Euskadiko 3 pertsonatik bik uste dute ezberdintasuna etxean hasten dela

Euskadiko hiru biztanletik bik uste dute emakumeen eta gizonen arteko ezberdintasuna etxean hasten dela, azken EiTB Focusen arabera. EiTB Taldearentzat Gizaker etxeak egindako makroinkestaren zortzigarren neurtaldiaren bigarren atala berdintasunaren ingurukoa da, EAEn gai horri buruz egindako lehen inkesta handia.

Inkesta otsailaren 22an eta 23an egin zuten, 1.200 pertsonari galdetuta: 400 Araban, 400 Bizkaian eta 400 Gipuzkoan. Asteartean, hilaren 6an, EAEko hauteskundeetarako boto asmoari buruzko galdeketaren emaitzak plazaratu zituen EiTBk. Martxoaren 8an, Emakumearen Nazioarteko Egunean, berdintasunari buruzkoak kaleratu ditu.

Emaitzon arabera, gazteriak uste du iraganeko akats berdinak egiten ari direla gaur egun ere.

Galdetutako hiru pertsonatik batek ezagutzen du, lanpostu berean egonda, gizonek baino gutxiago kobratzen duen emakumerik.

Horien % 60ren iritzian, ohikoa da antzeko lana egiteagatik emakumeei gizonei baino gutxiago ordaintzea.

Horren arrazoiaz galdetuta, matxismoari egotzi diote hori emakumeen % 30ek.

10 herritarretik 8k (% 82) uste dute emakumeek zuzendaritza postuetara iristeko zailtasun gehiago dituztela. Zehatzago esanda, emakumeen % 17k esan dute 'kristalezko sabaia' izan dutela parean.

Lantokian jasandako sexu jazarpenari dagokionez, gizonezkoek pairatutako kasu bakoitzeko 15 pairatzen dituzte emakumezkoek.

Langileen ia % 15ek sexu jazarpena ikusi dute inoiz lantokian.

Bestalde, galdetutakoen % 15,1ek sexu diskriminazioa jasan du lantokian.

Emakumeen % 18k pairatu dute inoiz sexu erasorik edo eraso saiakerarik.

EAEko herritarren ia % 20k gertu, familian edo lagunen artean, izan dute indarkeria matxistaren kasuren bat.

Galdetutako gehienak (% 82) indarkeria matxista gogorrago zigortzearen aldekoak dira.

Etxeko lanei buruz galdetuta, emakumeen % 46k lan guztiak edo ia guztiak egiten dituzte; gizonen kasuan, % 11 dira. Dena dela, etxe gehienetan lanak erdibana egiten dira.

Fitxa teknikoa

Ikerketa egiteko, EAEko 1.200 bizilagun elkarrizketatu dituzte: 400 Araban, 400 Bizkaian eta 400 Gipuzkoan. Lagin-akatsa ±2,83koa da, % 95eko konfiantza mailarekin (p=q=0'5, datu orokorretarako).

Lurralde historiko, udalerri, sexu eta adinaren arabera geruzatutako zorizko lagina da. Inkesten % 21,8 euskaraz egin dira eta gainerako % 78,2a, gaztelaniaz. Emaitzak herrietako biztanle kopuruaren arabera haztatu dira.

Elkarrizketak 2018ko otsailaren 22an eta 23an egin ziren, telefonoz.