Mildiu onddoak gogor kolpatu ditu Arabako Errioxako mahastiak, eta hurrengo mahats-bilketa mehatxatzen du

Arabako Errioxako mahastiek mildiu onddoaren agerraldi latzari aurre egin behar diote kanpaina honetan. Produkzioa nabarmen murrizten ari da eta datorren udazkeneko mahats-bilketa baldintzatuko du.

Arabako Foru Aldundiko Mahastizaintza eta Enologia zerbitzuak egindako txosten baten arabera, onddoa aurreko kanpainetan baino askoz biziago zabaldu da aurtengo uztan. Izan ere, prezipitazioak ohi baino ugariagoak izan dira, eta tenperaturak batezbestekoaren gainetik egon da, nabermen. Faktore horiek guztiek “onddoa hazteko salda perfektua” sortu dute.

Txostenean adierazten denez, hezetasun maila altua, laino iraunkorrak eta hazkunde begetatibo indartsua uztartuta, onddoa agertzeaz gain, zabaldu ere egin da bigarren infekzio-bolada baten bidez, eta ia eskualde osora iritsi da.

Txostenak nabarmentzen du, halaber, ustiategi askotan “ia ezinezkoa” izan dela prebentzio-tratamenduak aplikatzea, euri-jasa handien ondorioz ezin izan zutelako makinekin lursailetara sartu. Hori dela eta, mahastizainek ezin izan dute gaitza heda ez zedin garaiz jardun.

Arabako Errioxako ia lursail guztiek pairatu dute gaitza, baina aldeak daude lursailetik lursailera: batzuek oso kalte txikiak dituzte, % 10 inguru; beste batzuek, berriz, % 70-80 arteko kalteak. Altitudeak eta lurraren baldintzek ere eragina izan dute. Goialdeetan dauden mahastiek, ondo aireztatutakoek eta zoru arinagokoek kalte gutxiago jasan dituzte.

Aldundiak adierazi duenez, “mildiuaren afekzio-mailak kalte ekonomiko nabarmena ekarriko dio sektoreari kanpaina honetan, eta berez konplexua den egoera bat larriagotuko du Arabako Errioxako mahastizaintza eta ardogintza sektorearentzat”.

Hala ere, Arabako Txakolina mahastietan, Aiara bailaran, egoera hobea da. Klima ez da hain aproposa izan mildiua garatzeko, eta, inguruan ohikoagoa den gaixotasuna denez, mahastizainek prebentzio neurriak ezarri ohi dituzte.