Ekain Perrinoren erasotzaile ia guztiei 2 urteko kartzela zigorra ezarri diete, gorroto-delituagatik

Justiziak Ekain Perrinok 2021ean Basaurin jasandako eraso homofoboaren egile gehienak zigortu ditu. Hamaika egileetatik hamarrek bi urteko espetxe zigorra jaso dute, osotasun moralaren aurkako delituagatik; hamaikagarrenari, berriz, 14 hilabeteko kartzela zigorra eta zortzi hilabeteko isuna ezarri diote.

Orainek epaiaren berri jakin du, eta, horren arabera, guztiei 500 metroko eta bi urterako urruntze-agindua ezarri zaie, eta isunak ordaindu beharko dituzte.

Epaileek autoan adierazi dutenez, erasoaren egileek Perrino inguratu zuten Bizkotxaldeko parkean, konorterik gabe uzteraino kolpatu, eta irain homofoboak egin zizkioten, hala nola “marikoi zikina”, eta bertatik alde egiteko agintzen zioten bitartean, “nazkagarria" zela oihukatzen zioten.

Auzitegiak gorroto-delitu argitzat eta osotasun moralaren aurkako delitutzat jo du jokabidea, eta nagusitasun-abusuaren astungarria aplikatu diete. Gaineratu dutenez, gertakariaren intentsitateak eta behin eta berriz errepikatu izanak erakusten du "bazterkeriazko zio argia izan zutela, bere sexu orientazioagatik".

Epaileen arabera, erasoaren ondotik, biktimak antsietate handiko egokitze-nahasmendua izan zuen, eraso kolektibo eta publikoaren ondorio zuzena. Magistratuek “piztia talde” gisa deskribatu dituzte erasotzaileak. Era berean, Perrinoren testigantzaren sinesgarritasuna lekukoek berretsi zutela eta akusatuen koartadek oinarririk ez dutela nabarmentzen du sententziak.

Epaia oraindik ez da irmoa, eta Euskal Autonomia Erkidegoko Auzitegi Nagusiko Arlo Zibileko eta Zigor-arloko Salan errekurritu daiteke.

Eraso bortitza

Erasoa 2021eko ekainaren 6ko goizaldean gertatu zen, Bizkotxalde parkean, Basaurin. Lagun talde batek eraso egin zion Perrinori, eta, salatu zuenez, konorterik gabe utzi zuten, “marikoi zikina” deitzen zioten bitartean. Ertzainek berehala identifikatu zituzten erasotzaile guztiak, gertakarien lekura bertaratu zirenean.

Auzi-saioa epaiaren zain geratu zen pasa den martxoaren 11n. Epaiketaren azken egunean, akusatuek ukatu egin zuten Perrinoren aurkako irain homofoboak egin izana eta haren sexu-orientazioagatik eraso egin izana.

Hala ere, aurreko auzi-saio batean, biktimak ustezko erasotzaile guztiak identifikatu zituen. Gaineratu zuenez, eraso horren ondoren, kalean ikusten ditu "egunero" eta, bost urte igarota ere, tratamenduan jarraitzen du bizi izandakoak bere osasun mentalari kalte egin diolako.