Izan ginena

Gizakia gizaki denetik bizileku hobeagoen bila mugitu izan da. Joan etorri hauek gizateria aberastu dute alor guztietan,ezberdinen arteko hartu-emanak direlako aurrera pausoen oinarri. Baina jende mugimenduak beti gatazka eragin du, ez da inoiz baketsua izan, gizakiok berehala aldarrikatzen dugulako zapaltzen ari garen lurraren jabetza.

Eta mugimendu hauek ez dira antzinakoak europarrontzat. 1820 eta 1930 bitartean 52 miloi europear joan ziren Amerikara bizimodu hobearen bila. 1850 eta 1950 Ozeaniara joandako europarrak 5 miloi izan ziren. Españako gerra zibilak eta Bigarren Mundu Gerrak jende mugimendu izugarriak eragin zituen, sarraskiak saihesteko babes bila batez ere. Baina azken urtetan miloi asko izan dira lan bila eta aukera egokiak aurkitu nahiean mugitu diren europarrak. Gure DNAn,gure geneetan mugitu beharra eta mugitu izana hizki haundiz irarrita egon arren, historian zehar ohikoa izan den portaera dugu etorkinen ondorengoak garen herritar europarrok, zapaltzen dugun lurra eta etxea eraiki dugun orubea gurea bakarrik dela aldarrikatzea.

Emmanuel Macron presidente frantsesak aitortu du migranteekiko izandako portaera okerra izan dela, ez dela eraginkorra  eta ez dugula gizatasunez jokatu. Onartu du Frantziak eta Europak ezin dituztela iristen zaizkien etorkin guztiak hartu, horregatik zuhurtasunez jokatzeko deia egin du, baina ez du gehiegi zehaztu zeintzuk diren auzi hau bideratzeko erabaki egokiak. Gizataldeen arteko harremanak ez dira inoiz errazak izan, are gehiago ustez batzuen eremuetara “kanpotarrak” iritsi direnean. Migrazioak beti izan dira, itxura guztien arabera datozen urtetan eta hamarkadetan ugaritu egingo dira mugimendu hauek, eta ez dirudi babes hesiak eraikitzea izan daitekenik erantzun bakarra.

Konponbideak aipatzerakoan sarriegi demagogiara jotzen dugu, oso zailak eta korapiltsuak diren arazoek konponbide samurra izango balute legez. Baina agian gaur egun hiri guztietan derrigorrezkoa dugun ariketa hemen egokia izan liteke. Gure hirietan guztioak gara oinezko, bizikletaren erabile, auto gidari, garraio publikoetako bezero…zebrabidea pasatzerakoan gidariaren lekuan jar gaitezke, autoa daramagunean autobus publikoaren lehentasuna onar genezake, bizikletan goazela badakigu oinezkoen artean gabiltzala… Europan migrazioarekiko dugun jarrera, beti haserre doan autogidariarena da, zebrabidea pasatzeko beharrik inoiz izango ez duela uste duenarena… Egiten duguna egiten dugula, auzi honetan ezinbestekoa da enpatia, bestearen lekuan jartzeko ahalegina.