EBk onartu egin du Ukrainari 6.100 milioi ematea, misilak eta aire-defentsarako sistemak erosteko

Europako Batzordeak Ukrainari 6.100 milioi euroko ordainketa egitea onartu du astelehen honetan, aireko defentsa eta misilen aurkako sistemak, misilak, munizioa eta radarrak erosteko. Europar Batasunak emandako 90.000 milioi euroko maileguaren kargura egingo den beste ordainketa bat da, Errusiak herrialdearen aurka egiten dituen erasoei aurre egiteko.

Izan ere, uztailean 376 eraso izan ziren eta, Europako Batzordearen arabera, Volodimir Zelenskik zuzendutako herrialdearen defentsak indartzea "gero eta premiazkoagoa da". Testuinguru horretan, Ursula von der Leyenek adierazi du Europak "Ukrainak behar duen "guztia emango diola, "behar duen unean".

Ildo berean, Andrius Kubilius Defentsa eta Espazio komisarioak azpimarratu du mailegu horrek aukera ematen diola Ukrainari "herritarrak babesteko eta subiranotasuna defendatzeko premiaz behar dituen misilak eta aireko defentsa sistemak eskuratzeko".

Orain arte baimendutako 16.000 milioi euroei batuko zaie diru-partida, eta Ukrainak Sobietar Batasunarekiko independentzia lortu zueneko 35. urteurrenarekin bat eginez onartu da. Urteurrenaren testuinguruan, gainera, Europako hainbat buruzagi, tartean António Costa Europako Kontseiluaren presidentea, Kieven dira astelehen honetan bisitan.

Europar Batasuneko enpresak

Europako funtsekin finantzatuko diren erosketa gehienak, Europako Batzordearen ohar baten arabera, EBko defentsa-enpresei egingo zaizkie. Gainera, EBren "entregak nabarmen handitu" behar direla adierazi da oharrean, izakinak murriztuz, eskaerak lehenetsiz eta ekoizpena handituz.

"Ukrainak bere burua defendatzeko duen gaitasuna funtsezko defentsa-produktuen eskuragarritasun azkarraren araberakoa da", jaso da komunikatuan. Bertan zehazten denez, Kievek ordainketak eskatu ahal izango ditu defentsa-enpresekin sinatutako kontratuak aurkeztuta, eta Batzordeak berrikusi egingo ditu.

Boluntarioen Koalizioaren bilera

Hainbat liderrek Boluntarioen Koalizioaren bilera egin dute astelehen honetan. Besteak beste, Andy Burnham Erresuma Batuko lehen ministroak hartu du parte Kievera egin duen lehen bisitan, eta lehen ministro gisa egin duen nazioarteko lehen bidaian.

Bileran, buruzagi laboristak azpimarratu du taldeko kideek intertzeptore gehiago bidal ditzaketela Kievera, Errusiaren erasoei erantzuteko, baina onartu du Ukrainaren aliatuek "ahal duten guztia" egiten dutela.

Giorgia Meloni Italiako lehen ministroak ere parte hartu du bileran, modu telematikoan, eta berretsi egin du bere herrialdeak Ukrainari emandako "babes hautsiezina". Hala, laguntza humanitarioa, zehazki sorgailuak, bidaltzen jarraituko duela iragarri du, neguari begira sare elektrikoaren egonkortasuna bermatzeko.

Emmanuel Macron Frantziako presidenteak ere Kievi emandako babesa azpimarratu du, bileran parte hartu ondoren.

Zigor "gogorragoak" Errusiari bakea negoziatzeko presioa egiteko

Kaja Kallas Europar Batasuneko Kanpo Politikarako goi-ordezkariak astelehen honetan iragarri duenez, udazken honetan Errusiaren aurkako "zigor gogorragoak" proposatuko dizkie EBko estatu kideei. Horiek Errusiak 2022ko otsailean Ukraina inbaditu zuenetik Moskuren aurka hartutako 21 neurri murriztaileei gehituko zaizkie.

"Zigor gogorragoak proposatuko ditut Errusiaren aurka udazken honetan, eta are gehiago itxiko dugu Errusiako flota mamuaren inguruko setioa, Moskuri gerra finantzatzeko funtsak kentzeko. Ukraina zenbat eta indartsuago egin, orduan eta azkarrago behartuko dugu Errusia negoziazio mahaian esertzera", adierazi du Europako diplomaziaren buruak sare sozialetan Boluntarioen Koalizioaren bileran telematikoki parte hartu ondoren.