Zortzi funts dokumental berri barneratu zituen Eresbilek 2013an

2013 amaieran Eresbil Musikaren Euskal Artxiboak 216.206  dokumentu inbentariatu zituen, eta fondoa 1.879 material berrirekin handitu zen. Horien artean, 102.221 ikus-entzunezko dokumentuak eta 79.222 partiturak, liburutegiko 18.012 dokumentuak eta 16.751 dokumentu orokorrak (gutunak, argazkiak, programak, kartelak, dosierrak...) nabarmendu daitezke.

Iaz Eresbili dohaintzan emandako edo utzitako dokumentuen funtsak ezin izan dira kontabilitate horretan sartu. Zortzi funts berri dira: Manuel Zubillaga Funtsa, José Urquijo Funtsa, Herri Irratiaren soinu artxibategia, Ezkila argitaletxearen bilduma, Ruperto Iruarrizaga Funtsa, Imanol Olaizola Funtsa, Zabala Familiaren Funtsa eta José Menéndez Funtsa. Katalogatu arte zehazki jakiterik egongo ez den arren, 26.000 dokumentu inguru dira.

Krisi ekonomiko larriari, nazioarteko lankidetza indartuz egin dio aurre Eresbilek. Besteak beste, Habanatik, Granadatik eta Madrildik bidali dituzte publikazioak hainbat erakundek.

Euskal musikagileen partiturei dagokienez, 2013an 730 partitura berri jaso ditu Musikaren Euskal Artxiboak, 2012an baino % 30 gehiago. Orain, guztira, euskal musika eta autoreekin zerikusia duten 30.872 partitura ditu Eresbilek.

Internet bidezko bisitek ere nabarmen egin dute gora. 2013an 100.284 bisita jaso zituen bere webgunean, aurrekoan baina % 14,8 gehiago. 50 herrialdetako erabiltzaileak ditu Eresbilek, bi eremu geografiko aipagarrirekin: AEB (% 37) eta Espainia (% 26).

Bestalde, Eresbilek euskal musikari buruzko argitalpen elektronikoak bultzatzeari ekin dio, Musikeneko irakaslea den Itziar Larrinaga musikologoak Francisco Escuderoren obraren katalogoa editatu ondoren. Musikagileak egindako obra guztien azalpen xehatua da, eskuizkribu eta inprimaki guztien kokalekua eta horien grabazioak dauden ala ez jasotzen duena.

Halaber, Euskal Fundazioak bultzatzen duen Juan Zelaia Letamendi Musika Bekak musikaren arloan euskara garatzen jarraitzen du. Iaz, bekaren seigarren edizioaren deialdia eta esleipena egin zen, eta irabazleak Nagore Tolosa eta Iban Uribarri izan ziren, "Azkue, musika eta hizkuntza" proiektuarekin.

Eresbil nazioarteko jarduera eta egitasmoetan

2013. urtean zehar, Eresbilek Habanan musika ondareari buruz egin zen Nazioarteko Tailerrean ez ezik, Vienako Musika Liburutegien Nazioarteko Kongresuan eta Granadako AEDOMen jardunaldietan ere parte hartu zuen.

Horrez gain, Eresbilek Granadako Unibertsitateko Historia eta Musikaren Zientzietako Departamentuak zuzentzen duen I+G+B ikerketa proiektuan parte hartzen du, eta AMA (Access to Music Archives) ekimenaren datu baseko administraria ere bada Espainia mailan.

2014an

2013an nazioarteko hainbat jarduera eta egitasmotan parte hartu zuen Eresbilek (Habana, Viena, Granada...), eta 2014an ere ez du atsedenik hartuko.

Maiatzean (maiatzak 15-18 eta maiatzak 22-24) Musikasteren 42. edizioa egingo da. Lehen asteburuan, egungo musika izango da ardatz nagusia; bigarrenean, berriz, musika klasikoa hartuko dute, eta Valentin Zubiaurre bizkaitar musikagilea izango dute gogoan, haren heriotzaren mendeurrenean, antzinako musika, korurako musika eta amaierako kontzertuarekin.

Hainbat elkartetako kide da Eresbil, eta urtean zehar hainbat bilera eta kongresutan hartzen du parte. Aurten, Valentzian ospatuko diren AEDOMeko jardunaldietara joango da, baita Granadan egingo den harizko laukoteen kongresura eta Txileko musika artxiboei buruzkora ere. Gainera, Belgikako Antwerpen herrian, Musika Liburutegien Nazioarteko Elkarteko (AIBM) kongresuan parte hartzea ere aurreikusten du.