Europako Hizkuntza Aniztasunaren Goi Bilera jasoko du Donostiak

Donostiak Europako Hizkuntza Aniztasunaren Goi Bilera jasoko du azaroaren 8tik 10era. Hizkuntza aniztasuna bermatzeaz gain, hizkuntzen garapena ziurtatzea elkarbizitzarako eta bakerako funtsezko oinarriak direla aldarrikatzea du xede. Ekimena Donostia 2016ko programazioaren parte da, eta “elkarrekin bizitzeko kultura” finkatu dute lelo gisa.

Adituak eta denetariko antolakundeak bilduko dira Kursaalean izango den topagunean, hizkuntza eskubideen bermerako protokoloa aurkezteko asmoz. Izan ere, hizkuntza berdintasunaren alde eta desabantaila egoeran dauden hizkuntzen garapenerako tresna eraginkorra sortzea dute helburu.

Feminismoa

Alor desberdinetako tailerrak, kontzertuak eta proiekzioak egongo dira Tabakaleran, kultura parte-hartzaileago, parekideago eta demokratikoago bat aldarrikatzeko. “Feministaldia” izeneko jarduerak aukera ematen die ikuspegi feminista gertutik ezagutu nahi dutenei hausnarketa egitera, abenduaren 14tik 17ra.

Musika

Belako taldeak amaiera emango dio “Music Box” jaialdiari, hilaren 17an. Izan ere, urte osoan zehar hamabi kontzertu eskainiko dira, normalean kultur ekintzarik hartzen ez duten hiriko zenbait tokitan. Kontzertua Euskotren geltokian izango da.

Abenduan amaitzen diren jarduerak

XXI. mendeko erronka nagusiei aurre egiteko asmoz mahai-inguruak eta hitzaldiak prestatu dituzte, abenduaren 13ra arte. Era berean, “EUSkarriak” izeneko proiektuak Europako errealitate linguistikoaren eta euskararen inguruan hausnarketak bideratuko ditu. Gainera, hiri osoan zehar ikusiko dira ondorioztatutako ideia horiek, gutxien espero dugun moduetan.

“Iturriak” proiektuak hiriburuan kendu dituzten iturri guztiak plaza berean jarriko ditu, abenduaren 17ra arte, Maider Lopezen lankidetzarekin.

Bestalde, “Itsasgileak” izeneko erakusketari esker, XVI. mendeko itsas historian emakumeek izan zuten papera ezagutzeko eta ontzigintzaren ondorioz eskualdeen artean izandako harremanen berri jasotzeko aukera ere egongo da. Albaolan izango da, abendura arte.

“Insert Change” jarduerak, giza eskubideen inguruko pentsamendu kritikoa sustatuko du bideo-jokoen bitartez. Gainera, hamaika gaztek, bizi nahi duten etorkizunaren inguruko hausnarketa egingo dute urte osoan zehar. Jasotako ideia guztiak aztertu ostean, erantzun bakarra aurkeztuko dute, artelan batean islatuko dena.

Jarduera ugari prestatu dituzte Urumea ibaiarekiko harremana estutzeko asmoz. Izan ere, “Hidrologikak” izeneko proiektuaz gain, “Bakearen miliak” ere Urumea ibaiaren inguruetan garatuko da. Kasu honetan, bakearen eta gatazka armatuen inguruan hausnartzeko eta parte hartzeko aukera emango du ekimenak.