Gernikako biktimei omenaldia egin diete, Alemaniako presidentearekin batera

Alemaniako presidentearen bisita historikoa gaur arratsaldean amaituko da, Bilboko Guggenheim Museora egingo duten bisita instituzionalarekin.

Espainiako erregea Gernikako bonbardaketaren biktimei egindako omenaldian izan da, eta horrekprotesta ugari eragin ditu goizean Gernikako kaleetan. Omenaldia segurtasun neurri handien artean egin da.

Alemaniako presidenteak Gernikako Bakearen Museoa bisitatuko du orain. Ondoren, bere lehen hitzak espero dira.

Frank-Walter Steinmeier Alemaniako Errepublika Federaleko presidenteak eta Felipe VI .a Espainiako erregeak omenaldia egin diete Gernikan Alemaniako Kondor Legioak eta Italiako Abiazio Legionarioak 1937ko apirilaren 26an egindako bonbardaketako biktimei. Lore-eskaintza batekin batera, kanpai-hotsa izan da Zalloko kanposantuan, eta bonbardaketatik bizirik atera diren pertsonak izan dira bertan.

Alemaniako estatuburua zutik egon da, Felipe VI .aren ondoan, Alemaniako funtzionarioek lore-koroa bat jarri duten tenpletearen aurrean. Ekitaldian Pablo Sorozabalen 'Gernika' interpretatu dute Bilboko Koral Elkarteak eta bere txistulari bandak.

Alemaniako presidentea 13:25ean iritsi da Gernikara. Orduan hasi dute omenaldi-ekitaldia, Espainiako erregea eta lehendakaria bertan direla.

Emilio Aperribay 1937ko apirilean Gernikako bonbardaketatik bizirik atera zen pertsonetako batek adierazi duenez, "hunkituta" dago ostiral honetan Bizkaiko udalerrian biktimei egingo zaien omenaldiaren aurrean, eta eskerrak eman dizkio Alemaniako presidenteari, gertatutakoa "beste inon ez gertatzea" espero baitu.

Eneko Andueza PSE-EEko idazkari nagusiak esan du Pedro Sanchezen Espainiako Gobernuak ez duela barkamenik eskatu behar Gernikako bonbardaketagatik. Espainiako Gobernuak 1937ko Gernikako bonbardaketagatik barkamena eskatzeko Imanol Pradales lehendakariak egindako apelazioaren ostean, Anduezak sare sozialetan erantzun du ez duela halakorik egin behar. 

Aitor Esteban EBBko presidenteak adierazi du Espainiar Estatuak eta erregeak "barkamena" eskatu behar dutela, Alemaniako presidenteak egingo duen bezala. 

Euskadi Irratiak 1937ko bonbardaketa bizi izan zuten bi emakume elkarrizketatu ditu, eta gogora ekarri dituzte orduko bizipenak. Egun hartan gertatutakoa ondo gogoratzen dute biek, eta euren testigantzak oso garrantzitsuak dira jasandakoa inoiz ez ahazteko.

GKSk elkarretaratzea egin du Gernikan, Espainiako erregearen bisita dela eta. 

Gaur goizean, ezezagun batzuek pintadak egin dituzte muralean. Garbiketa zerbitzuek dagoeneko ezagatu dituzte.

AJuria Enean egin dioten harrera ofiziala amaituta, Gernikara bidean da Alemaniako presidentea. Han, omenaldia egingo diete bonbardaketen biktimei, Gernikako hilerrian.

Harrera ofiziala egin dio Imanol Pradales lehendakariak Alemaniako presidenteari. Ekitaldia hasteko, aurresku bat eskaini diote. 

Ordubeteko atzerapenarekin, Alemaniako presidentea Forondako aireportura iritsi da dagoeneko. Handik, Alemaniako lehen damarekin, Ajuria Eneara joango da. Bertan, Imanol Pradales lehendariak hartuko ditu. 

9:45ean Alemaniako presidentearekin eta lehen damarekin Forondan lur hartu behar zuen hegazkina atzeratu egin da. 

Bonbardaketatik bizirik atera ziren 95 urteko bi emakumerekin bilduko da Alemaniako estatuburua: Crucita Etxabe eta Mari Carmen Agirre. Omenaldia Gernikako hilerrian egingo da, eguerdian.

Frank-Walter Steinmeier Alemaniako egungo presidenteak barkamena eskatu zion Poloniari 2019an, nazien "tirania" eta "basakeria" dela eta, Bigarren Mundu Gerra hasi eta 80 urtera, Poloniako Wielun hirian egindako memorazioan. Bertan, alemaniarren lehen bonbak erori ziren, eta munduko beste lider batzuk ere bertaratu ziren. "Burua makurtzen dut, Alemaniako tiraniaren biktima poloniarren aurrean, eta barkamena eskatzen dizuet. Ez dugu inoiz ahaztuko ", esan zuen Alemaniako presidenteak. Steinmeierrek ere barkamena eskatu zuen 2024an, Kreta bisitatu zuenean, Hirugarren Reichak Grezian gerra garaian egindako krimenengatik.

Gaurkoa egun garrantzitsua izango da Gernikako bonbardaketen biktimentzat. Alemaniako presidente batek, historian aurrenekoz, Gernikako biktimen omenaldian parte hartuko du. Eguerdian egingo diete ekitaldia, Zalloko hilerrian.