Muskizko bentzeno mailaren datuak aldakorrak direla eta, prebentzio-neurriei eustea erabaki du Jaurlaritzak

Eusko Jaurlaritzak jakinarazi duenez, Petronorren izandako intzidentziaren ondorioz Muskiz inguruan atzemandako bentzeno-mailak beheranzko joerari eusten dio, baina datuak aldakorrak dira. Airearen Kalitatearen Sareak emandako azken datuen arabera, metro kubikoko 8 mikrogramo inguru neurtu dituzte goizaldean, eta balio horiek atzo prebentzio-neurriak aktibatzea eragin zutenak (100 eta 200 mikrogramo artean) baino nabarmen txikiagoak dira.

Hala ere, Osasun Publikoak arreta handiz jokatzeko dei egin du, eta izan daitezkeen aldaketen aurrean etengabeko zaintzari eusteko, bereziki kontuan izanda egunez tenperaturak gora egin dezakeela eta horrek kutsadura mailari eragingo diola.

14:00etan hurrengo partea eman arte, esposizioa murrizteko gomendioei eutsi diete. Herritar guztientzako neurrien artean daude ahal den guztietan barruko espazio itxietan egotea, ateak eta leihoak itxita edukitzea, aire zabalean jarduera fisikoa saihestea eta etxebizitzen aireztapena mugatzea, eta birzirkulazio bidezko klimatizazio-sistemak lehenestea.

Era berean, arreta berezia eskatu zaie talde zaurgarriei, hala nola arnasketako gaixotasunak edo gaixotasun kardiobaskularrak dituzten pertsonei, adingabeei, adinekoei eta haurdun dauden emakumeei; izan ere, gertakariak irauten duen bitartean, saihestu egin beharko dute kanpoko airearekiko alferrikako esposizioak. Hezkuntza-zentroen, kirol-zentroen eta zentro soziosanitarioen kasuan, aire zabaleko jarduerak etetea gomendatu dute, eta adingabeak eta mendeko pertsonak aireztapen kontrolatua duten barnealdeetan egotea.

Eduardo Briones Muskizko alkateak, gainera, kalera ez irtetea eta haurrak eskolara ez eramatea gomendatu du bart Radio Euskadin.

Muskizko institutuan pertsianak jaitsi dituzte, inor ez dago jolastokian eta klaseak online ematea erabaki dute, Udalaren aholkuei jarraituz. Antzeko egoera dute Somorrostroko Lanbide Heziketako zentroan ere, klasera ez joateko gomendioa eman baitiete ikasleei.

Horren aurrean, Guillermo Herrero Eusko Jaurlaritzaren Osasun Publikoko zuzendariak Radio Euskadin bertan argitu du ez dagoela konfinamendurik eta herritarrak ez daudela arriskuan. Hori horrela, bizimodu normala egin daitekeela azpimarratu du, baina inguru horretan, besteak beste, korrika egitera ez ateratzeko eskatu du.

Herreroren hitzetan, oraingoz ez dakite kutsadurak osasun arazorik eragin duen.

Petronorren arabera, segurtasun-protokoloek bildutako neurri zuzentzaileak aplikatzen ari dira intzidentzia kontrolatzeko eta isuria ahalik eta azkarren murrizteko.

Petronorren izandako intzidentzia baten ondorioz, gasolina biltegiko erregai zati bat lurrundu egin da, eta horrek eragin du airea kutsatzea.