Euskal zinemak urte oparoa biribildu nahi du Goyetan

Hitzordua jarrita dago: larunbata, otsailak 28, 22:00etan, Bartzelonako Forum-CCIB auditoriumean. Zita hori baliatu nahi du euskal zinemak aretoetan eta jaialdietan egindako urte arrakastatsuari amaiera bikaina emateko. Espainiako Zinema Akademiaren sariek burutuko dute, besteak beste, "Jone, batzuetan", "Aro berria", "Karmele", "Maspalomas" eta "Gaua" euskarazko film luzeen estreinak eta "Los domingos" eta "Maspalomas" lanen Zinemaldiko Maskorrak utzi dizkigun bidea.

Aurten, inoiz baino aukera gehiago daude, egon, sariak etxeratzeko. Euskal film eta profesionalek Espainiako zinemaren sarietarako 47 izendapen lortu dituzte orotara, "Los domingos"en 13ak buru direla, eta sarien 28 sailetako 23tan egongo da, gutxienez, euskal zinemaren ordezkari bat.

"Los domingos" Alauda Ruiz de Azuaren filmak 13 izendapen ditu, beste edozein pelikulak baino gehiago, tartean film, zuzendaritza eta gidoi onenena. Donostiako Zinemaldiko Urrezko Maskorraren irabazlea, gainera, interpretazio arloko sei ataletatik bostetan dago finalisten artean: emakumezko aktore onena (Patricia Lopez Arnaiz), gizonezko aktore onena (Miguel Garcés), antzeztaldeko emakumezko aktore onena (Nagore Aranburu), antzeztaldeko gizonezko aktore onena (Juan Minujín) eta emakumezko aktore berri onena (Blanca Soroa).

"Maspalomas" euskal filmeko aktoreak ere denen ahotan daude, sarietarako faboritoez mintzo garela; Jose Ramon Soroiz protagonistak interpretazio onenaren Zilarrezko Maskorra jaso zuen Donostiako Zinemaldian, eta Goya saria beste berrespen bat izango litzateke legorretarrak Bixenteren larruan eginiko lan ederrarentzat. Kandido Urangak antzeztaldeko aktore gisa egindako lanak ere izendapena ekarri dio moriartitarren filmari, guztira jasotako bederatzietako bat. Film, zuzendaritza eta gidoi onenaren saria ere irabaz dezake adineko homosexual baten armairurako buelta kontatzen duen pelikulak.

Ikus-entzunezkoetarako gero eta lur emankorragoa da Euskal Herria, zinez, berezko talentuari, erakundeen arteko lankidetzari, EITBren parte-hartzeari eta zerga pizgarriei esker, eta horren erakusgarri da euskal ekoiztetxeek gidatutako proiektu handiek jaso dituzten izendapenak: "Los tigres" (Kowalski Films ekoiztetxearen parte-hartzea duen lan honek 7 izendapen jaso ditu), "Un fantasma en la batalla" (Basoilarraren Filmak euskal ekoiztetxearen produkzioak 4 izendapen, tartean Susana Abaitua protagonistarena), "El talento" (K2000 euskal ekoiztetxearen lanak izendapen bat), "La tregua" (Spassk 99ren lanak beste bat) eta "La misteriosa mirada del flamenco" (iberoamerikar film onenaren sarirako izendatuta dagoen txiletar filmak Irusoin euskal ekoiztetxearen parte-hartzea du).

"Gaua", Paul Urkijoren hirugarren film luzea, hiru ataletan dago izendatuta (jantzien diseinu onena, makillaje eta ile-apaintze onena eta efektu berezi onenak), "Balearic" Ion de Sosaren lana zuzendari berri onenarenean, "Dekoratua" Uniko bilbotar ekoiztetxearen pelikula animaziozko film onenarenean eta "Zona wao" film labur dokumentalen atalean. Lau film horiek, "Maspalomas" lanak bezala, EITBren parte-hartzea dute.

Azkenik, euskal profesionalek Euskal Herritik kanpoko ekoizpenetan egindako lana ere hartu du aintzat Espainiako akademiak, hala nola Elena Irureta aktorearena eta Urko Garai soinu teknikariarena "Sorda" filmean eta Aitor Berenguer soinu teknikariarena "El cautivo" Alejandro Amenabarren pelikulan.

Susan Sarandon eta Gonzalo Suarez

Goya sarien gala Luis Tosar aktoreak eta Rigoberta Bandini aktore eta musikariak aurkeztuko dute, eta, berorretan, Susan Sarandon estatubatuar aktoreak Nazioarteko Goya jasoko du eta Gonzalo Suarez zinemagile eta idazleari Ohorezko Goya saria emango diote. 

Izango ahal da 2025eko ekoizpenaren itxiera hau urtearen parekoa euskal zinemarentzat. Larunbat iluntzean ikusiko dugu, eta aurtengoari begira jarraituko dugu.