David Ilundain eta Helena Bengoetxea zuzendarien film berriak, zinemetan

“Mallorca confidencial” David Ilundainen (Iruñea, 1975) pelikula eta “Petrus” Helena Bengoetxearen (Iruñea, 1967) gidaritzapean filmatutako dokumentala zinema aretoetara iritsiko dira gaur, ostiralarekin.

Ilundainek (“B, la película”,) “Mallorca confidencial” zuzendu du, Lolita Flores, Asia Ortega eta Jordi Sanchez protagonista dituen istorioa: “Ur garden eta mediterranear patxada erakutsi ohi dituen postal idilikotik haratago, uharteko txoko ilunenetan barneratzen da filma, anbizioa, familiarteko sekretuak eta goi mailako ustelkeria harilkatzen dituen korapilo konplexu bat askatzeko”.  

“Petrus”ek, bestalde, Joseba Lekuona gerturatzen digu: artelanak zizelkatzen ditu arte-merkatu esklusibo baterako. Simeon Hidalgo irakasle erretiratuak, bestalde, nekez mantentzen du Petrus museoa, ezerezaren erdian dagoen kultur proiektua, non Elsa Plano alkateak haranaren biziraupena bere bizi-gurutzada bihurtzen duen. Josebak, Simeonek eta Elsak beren bideak gurutzatzen dituzte, eta bakoitzak bere erara, egunerokotasuna erresistentzia modu bihurtzen du. 

Gainera, ostiral honetatik aurrera, Adi! Filmak Euskaraz programaren eskutik, "Fleak" animaziozko finlandiar pelikula euskaraz ikusteko aukera izango da.