Guardia Zibilak amaitu du Leire Diez kasuari buruzko dokumentazio bilketa PSOEren egoitzan, 12 ordu eta gero

Guardia Zibilaren Unitate Zentral Operatiboko (UCO) agenteak hainbat jarduera egin dituzte goizean aldi berean, guztiak ere Santiago Pedraz Auzitegi Nazionaleko epaileak Leire Díez militante sozialistaren inguruan zabalduta duen ikerketarekin lotuta, prozedimentu judizialak neutralizatzeko ustez egindako lanengatik. 

Batetik,  OCUko agenteak PSOEren egoitzan sartu dira, Madrilgo Ferraz kalean, Leire Diez PSOEko militante ohiari ustez egindako ordainketekin lotutako dokumentazioa biltzera. 12 ordu baino gehiago igaro dituzte han.

Santos Cerdan PSOEko Antolakuntza idazkaria izandakoaren eta Ana Maria Fuentes alderdiko gerentearen mezu elektronikoen kopia egin dute, kontabilitatea jasotzen duten liburuak aztertu dituzte eta Ferrazerako sartu-irtenen erregistroa begiratu dute. Halaber, egoitzako aparkalekura sartu diren autoei eta PSOEk antolatutako bidaia guztiei buruzko informazioa eskatu ditu epaileak. 21:00ak aldera atera dira poliziak sozialisten egoitzatik. 

Antzeko helburuekin egindako beste jarduera batean, OCUko agenteak Guzmán el Bueno kaleko Guardia Zibilaren egoitzara ere joan dira, Leire Diez auziari buruzko informazioa eta lekukotzak biltzeko.

Kasuaren iturriek adierazi dutenez, Antonio Balas UCOko Delitu Ekonomikoen Departamentuko teniente koronela Guardia Zibilaren Zuzendaritza Nagusiaren egoitzan izan da asteazken honetan, ikerketak UCOko agente ohi bati ere eragiten diolako; ikerketa judizialak oztopatu ote ziren ikertzen ari dira.

Agente ohi hori Juan Sanchez Yepes da, Unitate Zentral Operatiboko Kapital Zuriketako taldeko kide izan zen Guardia Zibileko agentea. Lehenago ere deklaratu izan du hidrokarburoen bilbeekin lotutako beste auzi batzuetan, hala nola, Gaslow auzian.

Miaketak

Errekerimendu horiekin batera, hainbat miaketa ere egin ditu Guardia Zibilaren Unitate Zentral Operatiboak; zehazki, Cerdanen etxebizitza (Milagron) eta Gaspar Zarrias Andaluziako Juntako presidenteorde ohiaren etxebizitzak erregistratu ditu. Biak ala biak inputatu egin ditu Pedraz epaileak. 15:00ak inguruan atera dira zortzi agente Cerdanen etxetik, eskutan sei motxila, bi maleta eta bi kaxa zituztela. 

Javier Pérez Dolset enpresariaren etxebizitza ere miatu dute, Mostolesen (Madril).

"Ez du zerikusirik" legez kanpoko finantziazioarekin, PSOEren arabera

PSOEk ohar batean argitu duenez, "erabateko lankidetzarekin" erantzun diote Auzitegi Nazionaleko 5. zenbakiko Epaitegiak agindutako dokumentazio-errekerimenduari, eta azpimarratu duenez,  "ez du zerikusirik" alderdiaren balizko legez kanpoko finantziazioarekin. 

UCOko agenteak Ferrazeko egoitzan sartu ostean eman ditu azalpenak Espainiako alderdi sozialistak eta jarduketa hor "legez kanpoko finantzaketarekin zerikusirik ez duen isilpeko prozedura baten barruan" kokatzen dela argitu du. 

PSOEk zehaztu duenez, jarduketaren xedea "errekerimendukoa da, ez erregistratzekoa", eta "Justiziarekin lankidetza osoa" eta "jarduera judizialekiko erabateko errespetua" azpimarratu ditu.

Inputazio berriak

Testuinguru horretan, Santos Cerdan PSOEko Antolakuntza idazkari ohia, Gaspar Zarrias Andaluziako Juntako presidenteorde ohia eta Ana Maria Fuentes alderdiko gerentea inputatzea erabaki du magistratuak, beste hainbaten artean. 

Magistratu instruktoreak argitu nahi du, alde batetik, ea PSOEk ordainketarik egin ote zuen epaileen, fiskalen eta segurtasun-indarretako kideen aurkako informazio sentikorra bilatzen zuen ustezko sareari, eta, bestetik, ea Diezek irregulartasunik egin ote zuen enpresa publikoen eta SEPIren mendeko erakundeen kontratuetan.

Ismael Oliver eta Jacobo Teijelo abokatuak (Cerdanen defentsa abokatua) ere ikertzen ari da Pedraz, eta Juan Manuel Serrano Quintana Correoseko presidente ohiak eta Juan Francisco Serrano Martinez Cerdanen alboko izandakoak ikertuei lagundu zietenaren zantzuak aurkitu ditu, baina ikerketak ematen duenaren zain egon beharko litzatekeela uste du, erantzukizun penala zehazteko.

Leire Diezek "albiste faltsuetan oinarritutako erasoan" kokatu ditu polizia-jarduketak

Leire Diez judizialki ikertutako PSOEko militante ohiak "albiste faltsuetan oinarritutako etengabeko erasoan kokatu du" Guardia Zibilaren Unitate Zentral Operatiboa (UCO) PSOEren egoitzan sartu izana. 

"Betikoa da, azken urtebetean jasaten ari naizenaren segida", adierazi du Diezek Rac1-en egindako elkarrizketa batean. Erasotzaileak, "betiko" komunikabideak direla esan du. 

Ildo horretan gehitu duenez, 'Kitchen' ak ondoriorik izan ez zuenez, gauza bera egiten jarraitzen da", Mariano Rajoyren Gobernuko Barne Ministerioak antolatutako ustezko operazio parapoliziala ikertzen ari den kasuari erreferentzia eginez.

Diezek esan du ez dakiela ezer UCO asteazken honetan Ferraz kaleko egoitzan sartzeari buruz, eta esan du: "Aspaldi da ezer ulertzen ez dudala. Edo bai, ulertzen dut... eta ez dakit horrek lasaitu ala asaldatu egiten nauen". 

Ukatu egin du epaileei buruzko informazioa lortzeko zerbitzuekin lotuta PSOEtik eskupekorik jaso izana, eta diru sarrera guztiak eta dokumentazio guztia aurkeztu dituela adierazi du.

"Zur eta lur uzten nau, nik dagoeneko eman baititut nire diru sarrera guztiak, dokumentazio guztia. Ez du zentzu handirik, egia esan", azpimarratu du.