Gorenak atzera bota du ministroak abuztuan Senatuan agertzera behartzeko PPk egindako premiazko eskaera, Ceutako krisia dela eta

Auzitegi Gorenak atzera bota du PPk eskatutako kautelazko neurria, Espainiako Gobernuari agintzeko gehienez 24 orduko epean beharrezko erabakiak har ditzala ministroek abuztuan Senatuan agerraldia egin dezaten, Ceutako migrazio-krisiaren harira.

Hala eskatu zuten PPko zenbait senatarik, hilabete honetan Barne, Defentsa eta Kanpo Arazoetako ministroak deituta zeuden batzordeetara agertu ez zirelako, eta “egungo aldi ez-aktiboa amaitu aurretik” bertaratzea bermatzeko (abuztuaren 31n amaituko da).

Hala ere, Auzitegi Goreneko Oporraldiko Salak kaleratu berri duen auto batean, eskaera ezetsi du, “ez baita behar bezala justifikatzen” parlamentu-kontrola nahitaez abuztuko ezohiko aldian egin behar denik. "Are gehiago, kontuan hartzen badugu kautelazko neurria ohiko izapideagatik ebaztea ez dela gehiegi atzeratuko", erantsi du.

Bestalde, PSOEk ostegun honetan iragarri duenez, zazpi ministrok agerraldia egingo dute datorren astean Kongresuan, Espainiako Gobernuak Ceutako krisia kudeatzeko hartu dituen erabakien berri emateko.

Aurreikuspenen arabera, Margarita Robles Defentsa ministroa asteartean joango da Kongresura, abuztuaren 25ean; Felix Bolaños Presidentetza, Justizia eta Gorteekiko Harremanetarako ministroa eta Monica Garcia Osasun ministroa, ostegunean; Jose Manuel Albares Kanpo Arazoetako ministroa, Fernando Grande-Marlaska Barne ministroa eta Elma Saiz Gizarteratze, Gizarte Segurantza eta Migrazio ministroa, ostiralean; eta Sira Rego Gazteria eta Haurtzaroko ministroa, hurrengo astelehenean.

Felipe VI.aren bisita Ceutara

Migrazio krisiaren harira, PPko buru Alberto Nuñez Feijook erregeari Ceuta bisitatzeko baimena emateko eskatu dio Gobernuari. Feijooren hitzetan, Felipe VI.ak “Ceutara joan nahi du”, Estatuburu gisa “hala dagokiolako”, hiri autonomoan duten “krisi humanitarioa eta osasun publikoko eta ordena publikoko egoera” ikusita.

Halaber, PPko buruak eskertu egin du Felipe VI.aren "keinua", abuztuaren hasieran harrera egin ziolako Marivent Jauregian (Palma) Juan Jesus Vivas Ceutako presidenteari. Vivasek Ceutan egoera zein den azaldu zion, eta erregeak bisita egin nahi duela eta "Gobernuak desplazamendu hori aintzat hartu eta onartzen duenean" egingo duela esan zion, Feijooren esanetan.

Bestalde, Patxi Lopez PSOEk Kongresuan duen bozeramaileak PP eskuin muturrera eraman izana eta "herrialde honetako gezurren elikatzaile handiena" izatea egotzi dio Feijoori.