Etxebizitza eskubidearen aldeko kanpalekuak eta mobilizazioak egiten jarraitzen dute Estatuko hiri guztietan. Bien bitartean, Pedro Sanchez presidenteak egun batzuk hartu ditu egoeraz hausnartzeko eta hauteskundeak aurreratuko dituen ala ez erabakitzeko.
Agiri bateratu batean bi sindikatuek jakinarazi dute zuzendaritza organoak bilduko dituztela Kongresuaren ezetza baloratzeko eta hurrengo pausuak erabakitzeko. Mugimendu sozialekin eta gainerako sindikatuekin ekintza sindikal bateratu baterako aukerak aztertu nahi dituzte.
Zaparrada handi batek ezustean harrapatu ditu arratsaldean etxebizitzaren krisiari aurre egiteko neurrien eske Puerta de Solen kanpatuta dauden ehunka pertsonak. "Ez gara joango, geldituko gara", oihukatzen zuten dendetako sabaietatik ura kentzen zuten bitartean.
Bereziki jendetsuak izaten ari dira Bilboko, Gasteizko eta Iruñeko mobilizazioak. 'Borroka da bide bakarra' edota 'etxebizitza ez da negozioa' oihukatuz, "guztiontzako etxebizitza" ari dira aldarrikatzen.
Sindikatuaren aburuz, "oso larria" da Espainiako Kongresuan gertaturikoa. "Higiezinen patronalaren eta espekulatzaileen interesak defendatu" dituztela EAJk eta UPNk salatu du eta kalean presioa areagotzeko deia egin du.
Kongresuan eztabaida betean ari zirenean eta dekretuak oraindik indarrean zeuden bitartean, adin txikiko bi haur dituen familia bat etxetik atera dutela salatu du Etxebizitzaren Sindikatu Sozialistak. Hainbat lagun etxegabetzea eragoztea gerturatu badira ere, "familiak 5 minutu soilik izan ditu bere gauzak etxetik jasotzeko", jakinarazi du sindikatuak.
Bi lege-dekretuak ofizialki indargabetuta daude dagoeneko eta ezingo dira aplikatu, Kongresuko bozketetako emaitzak argitaratu baititu dagoeneko BOEk.
Igande honetan bilera egingo dute Sumar osatzen duten alderdiek. Oraingoz, ez dute aurreikusten hautagaiaren edo hautagaitzaren markaren berri ematea. Gainera, ez da argitu oraindik hauteskundeetarako Podemosekin bat egiteko aukerarik izango duten ere.
Bestalde, Ione Belarra Podemoseko idazkari nagusiaren esanetan, kaleko jendeak "ez ditu hauteskundeak nahi, irtenbideak baizik". Ildo horretan, "makina behartzeko" eta "hilero" etxebizitza dekretu "anbiziotsu" bat onartzeko eskatu dio Gobernuari.
Esquerra Republicanak (ERC) Kongresuan duen bozeramaileak, Gabriel Rufianek, gogorarazi du "botoa emateko moduko ezer" ez dagoela PSOEren ezkerrean, eta beraz, "gehitzeko ezer" ez daukala gogorarazi dio Pedro Sanchezi. Hori dela eta, hartu beharreko erabakia "buruz hotz duela" hartzeko eskatu dio.
Alicia del Rio sindikatuko bozeramaileak azpimarratu du "herriaren botereak eztanda" egin duela eta hori "geldiezina" dela. Hedabideen aurrean egindako agerraldian alderdi politiko guztiak kritikatu ditu; eskuina, dekretuei ezezkoa emateagatik; eta ezkerra, "etxebizitzaren arazoak konpontzeko ez direlako "gai izan".
Bere hitzetan, "amaitu da politikarien garaia, baina ez politikariena". "Politika kaletik, jendearen politika" egiteko garaia dela uste du.
Kongresuko bozketen ostean, Sumerreko ministro guztiak elkarrekin agertu dira hedabideen aurrean Pablo Bustinduy Eskubide Sozialetako ministroa buru zutela. Bere hitzetan, eskuindarrek "errentarien beso politiko bezala jokatu dute" euren "hautesleen aurka", eta herritarrei kalean jarraitzeko eskatu die, "eskubideak aldarrikatuz".
Ministroak Junts alderdiari aipamen berezia egin dio; "akatsa hautestontzietan ordainduko" duela esan du eta "bere espazio politikoa desagertzea" ere eragin dezakeela aurreikusi du.
Moncloa jauregiko iturriek lasaitasuna eskatu dute. Azaldu dutenez, Pedro Sanchez presidenteak denbora bat hartuko ditu Kongresuan gertatu denaz hausnartzeko eta asteburuan erabakiko du, alderdi barruko jende ugarik eskatzen dion bezala, hauteskundeak aurreratu, ala aurrera jarraitu.
Alberto Nuñez Feijoo Alderdi Popularreko buruzagiak agerraldia egin du hedabideen aurrean eztabaida eta bozketak amaitu direnean eta salatu du Gobernua "hauteskundeetan pentsatuz" mugitu dela egunotan. Bere ustez, Kongresura eramandako bi dekretuek "ez diote ez Maricarmeni ez inori laguntzen". Hori esanda, hauteskundeak deitzeko erronka bota dio Sanchezi eta prest dagoela adierazi du.
Kasu honetan aldeko 166 boto eta kontrako 184 izan dira. Iragarrita zegoen bezala, PPk, Voxek, UPNk, Juntsek, EAJk eta Coalición Canariak eman dute kontrako bozka.
Lehen dekretuaren indargabetzeak Kongresutik kanpo bildutako jendetzaren animoak piztu ditu. Horietako asko Solera itzultzen hasi dira martxa batean, bigarrenaren bozketa amaitu arte itxaron gabe. Tartean, bihar, larunbateko manifestaziora arte kanpaldia mantentzea eskatzen zuten ahotsak entzun dira. Hala ere, oihurik ozenena greba orokorra deitzea eskatzen duena izan da.
172 diputatuk alde bozkatu dute eta 178k aurka. Beraz, etxebizitzari buruzko lehen dekretuak ez du Kongresuko proba gainditu. Espero bezala, PPk, Voxek, UPNk eta Juntsek kontra bozkatu dute.
Diputatuek ahoz gora bozkatu behar dute, baiezkoarekin, ezezkoarekin edo abstentzioarekin. Aurreikusi bezala, Juntseko lehen diputatuek ezezkoa eman diote lehen dekretu horri.
"Akats politiko larria egiten ari dira eta beren jendeak hautestontzietan ordainaraziko die".
Sergio Sayas PPko diputatuak Sanchezen Gobernuaren aurka egin du. Horren esanetan, egungo gobernuaren balantzea "suntsitzailea" da eta etxebizitza erostea milioika espainiarrentzat "ezinezko misioa" da.
Montse Minguez PSOEko diputatuaren esanetan, gaur bi dekretuak atzera botata ere, "etxebizitzaren arazoa ez da desagertuko".
Jose Maria Figaredo Voxeko diputatuaren arabera, Sanchezen Gobernua da "Espainiako historiako gezurtiena" ez ezik, espainiarrei "kalte gehien" eragin diena.
Alberto Ibañez Sumarreko diputatuak gaur Kongresuan bozkatuko dituzte bi etxebizitza dekretuak defendatu ditu: "Bi dekretuak dira garrantzitsuak, herritarrek bien alde bozkatzeko eskatzen digute". Gaineratu duenez, gaurkoan diputatuek jendearen edo etxejabeen aldean dauden erabaki behar dute.
Etna Estrems ERCko diputatuak adierazi duenez, dekretuen aurka bozkatzen duten alderdiak izango dira hemendik aurrera gertatzen diren etxegabetzeen erantzuleak.
EH Bilduk bi dekretuen alde bozkatuko duela berretsi du Oskar Matute EH Bilduko diputatuak. Ez direla nahikoak onartu arren, "funtsezkoak" eta "oso beharrezkoak" direla nabarmendu du.
Maribel Vaquero EAJk Kongresuan duen bozeramaileak Espainiako Gobernuari aurpegiratu dio etxebizitzaren inguruko neurriak lege-dekretu bidez onartu izana, eta Kongresuko eztabaidari izkin egitea. Gainera, talde guztiekin hitz egin ez izana aurpegiratu dio Sanchezen Gobernuari. "Telefonoa hartu eta talde guztiekin hitz egitea izango zen gutxienekoa", gehitu du.
Cristina Valido Coalicion Canariako bozeramaileak bere alderdiak bigarren dekretuaren aurka bozkatuko duela berretsi du. Azaldu duenez, ez dute babestuko alokairu parkea are txikiagoa izatea eragingo lukeelako.
Alberto Catalan UPNko diputatuak hauteskunde orokorrak berehala deitzeko eskatu du Pedro Sanchez Espainiako gobernuburuari. "Gaur bihar baino hobeto", gaineratu du.
Agueda Mico Compromiseko bozeramaileak, bere aldetik, PSOE gogor kritikatu du etxebizitza neurriak bi dekretuak banatzeagatik. Are gehiago, sozialistak "deseroso" sentiarazten zituen neurriak bigarren dekretu batean sartzea aurpegiratu dio Espainiako Gobernuari.
Pablo Bustinduy Espainiako Gobernuko Eskubide Sozialen ministroak hartu du hitza. Horren esanetan, gaur egun bi etxebizitza dekretuei ezetz bozkatzea "oligarkiaren" interesak defendatzea eta "herriari bizkarra ematea" da. Halaber, diputatu kritikoei, aberria saltzea leporatu die eta azkeen asteetan norekin hitz egin duten publikoki adierazteko eskatu die.
Juan Bravo PPko Ogasun, Etxebizitza eta Azpiegitura idazkariordeak bere alderdiaren ezezko botoa defendatu du Kongresuaren aurrean egin duen agerraldian. Horren esanetan, aipaturiko bi dekretuek ez dute etxebizitzaren arazoa konpontzen eta ahulenak babesik gabe uzten ditu.
Patxi Lopez PSOEren Kongresuko bozeramaileak Juntsek bi etxebizitza dekretuak erretiratzeko egindako eskariari erantzun dio, Kongresuaren aurrean egin duen hitzaldian. "Ez dugu erretiratuko, ez gaude prest atzerapauso bakar bat ere emateko etxebizitza izateko eskubidearen defentsan", gaineratu du.
Nestor Regok BNG alderdiak dekretuen alde bozkatuko duela ziurtatu du, "nahikoak ez" izan arren "beharrezkoak eta premiazkoak" direla iritzita. Horren esanetan, ez da Sanchezen gobernua "salbatzeko" baiezko botoa, "etxebizitza duina izateko eskubidea lortzeko zailtasun handiak dituzten milaka pertsona salbatzeko baizik".
Kongresuak etxebizitza dekretuak atzera botaz gero, gorteak desegiteko eta hauteskundeak deitzeko eskatu dio Cristina Valido Coalicion Canariak Kongresuan duen diputatuak Pedro Sanchez Espainiako gobernuburuari.
Ageda Mico Compromiseko diputatuak PPren, Voxen eta Juntsen aurka egin du: "Boteretsuen laztan batengatik ama bera ere salduko lukete". Aldi berean, gizarte mobilizazioari esker, "PSOEk zortzi urtetan ekarri ez dituen" neurriak gaur Kongresuak bozkatuko dituztela esan du.
PSOE eta Sumarrek egindako eskariari erantzunez, bi etxebizitza dekretuen bozketa eskua altxatuz egingo da. Beste era batera esanda, diputatu bakoitzak hitzez adieraziko du bere botoa.
Sanchezek hauteskundeak azaroaren 29rako deitzea erabakitzen badu, Gorteak desegin eta hauteskundeak deitzeko Errege Dekretua urriaren 6an argitaratu beharko litzateke Espainiako Aldizkari Ofizialean.
Pedro Sanchez Espainiako Gobernuko presidenteak hauteskunde orokorrak azaroaren 29rako aurreratu ondoren, Gorteak desegiteko eta hauteskundeak deitzeko errege dekretua urriaren 6an argitaratuko da Espainiako Aldizkari Ofizialean.
Pablo Bustinduy Espainiako Gobernuko Eskubide Sozialen ministroak ostiral honetan azaldu duenez, Sumar edozein agertokitarako prest dago, baita hauteskundeak aurreratzen badira ere, eta Sumar osatzen duten ezkerreko alderdi guztiek igande honetan bilera egingo dutela iragarri du.
Isabel Rodriguez Etxebizitza ministroak ez du amore eman, eta Juntsek "iritziz aldatzea" eta gutxienez bi dekretuetatik lehenengoan ezezkotik "abstentziora pasatzea" espero du. Kongresuko saioa hasi atarian azaldu duenez, "benetako ordua iritsi da" eta diputatuek erabaki beharko dute herritarrekin edo putre funtsekin dauden.
Montse Minguez PSOEko bozeramailearen esanetan, Juntsek bi etxebizitza dekretuen aurka bozkatzea "ulertezina" da. "PSOEk ez du ezer galdutzat ematen azken minutura arte", adierazi du Ser irrati kateari eskaini dion elkarrizketan.
Eldiario.es egunkariak aurreratu duenez, Pedro Sanchez hauteskunde orokorrak azaroaren 29an deitzea aztertzen ari da. Beste hedabide batzuen arabera, berriz, hainbat ministrok legegintzaldia amaitzeko eta hauteskundeak deitzeko eskatu diote gobernuburuari.
Eldiario.es atariak aurreratu duenez, azaroaren 29a izan daiteke data posiblea. Beste hedabide batzuen arabera, Sanchezi legegintzaldia agortutzat jotzeko eskatu diote hainbat ministrok.
Pedro Sanchez Espainiako Gobernuko presidenteak esan du Gobernuak ez duela "atzerapausorik" emango etxebizitzarako eskubidearen defentsan, nahiz eta PPk, Voxek eta Juntsek Ministroen Kontseiluak onartutako dekretuak errefusatu.
Espainiako Gobernuko presidentearen esanetan, PPk, Voxek eta Juntsek gaur Kongresuan erakutsi beharko dute zer jarrera duten etxebizitza dekretuen inguruan. "Gehiengo sozialaren edo espekulatzaileen alde" dauden galdetu die.
PSOE eta Sumarreko talde parlamentarioek Kongresuko Mahaiari eskatu diote bi etxebizitza dekretuen bozketa eskua altxatuz egitea, bart Juntsek bi dekretuak baztertuko dituela iragarri eta gero.
