Gabonetako Loteria, krisialditik ateratzen

Gabonetako Loteria bere krisialditik ateratzen ari dela garbi dago. Azken lau urteei begiratuz gero, ondorengoa ikus dezakegu: Euskal Herrian 2013an 162 milioi euro, 2014an 169, 2015ean 174, 2016an 178 eta iaz 180 milioitik gora jokatu ziren. Beraz, azken bost urteotan % 15eko igoera izan da jokatutako diru kopuruan. Bizkaian biztanleko 80 euro jokatu dira, Gipuzkoan 58, Nafarroan 54 eta Araban 50.

Aurten, saritan 2.380 milioi euro banatuko dira Espainiako Estatuan, eta sari potoloa duenak jokatutako euro bakoitzeko 20.000 euro jasoko ditu, edota, beste modu batera esanda, dezimoko, 400.000 euro.

Euskal Herrian 32 aldiz egokitu da sari nagusia, azkena 2013an 62.246 sariari esker, Arrasaten. Zenbaki hori zuten 45 serie saldu zituzten herri horretan, eta 180 milioi euro banatu zituzten  (45 x 4.000.000 euro).

Bizkaiak 15 aldiz  jaso du sari nagusia (Bilbok 12 aldiz eta  Elorriok, Ugaok eta Deriok behin), Gipuzkoak 11tan (Donostiak 6tan, eta Irun, Villabona, Oñati, Arrasate eta Eibarrek behin), Nafarroak 5 aldiz (Iruñeak 3tan, eta Altsasu eta Tuterak behin) eta Arabak 3tan (Gasteizek 2tan eta Oionen behin).

Bitxikeriak

1812. urtean jokatu zen lehen aldiz Eguberritan, nahiz eta Gabonetako Loteria izenarekin 1892an atera zen aurrenekoz. Hala, aurtengoa, historian Eguberritan jokatzen den 206. loteria da.

5eko amaiera da dirua atzera gehien itzuli duen zenbakia (32 aldiz) eta gutxien ematen duena, berriz, 1 amaiera (8 aldiz).

Abenduaren 22an goizeko 08:00etan zabalduko dira Madrilgo Errege Antzokiko ateak, eta bertan dauden 1746 eserlekuak jendeak hartzen dituenean, ez zaio beste inori sartzen utziko. 08:30ean osatuko da zozketa zuzenduko duen mahaia, eta loteria-ontzi handian 100.000 bola-zenbaki eta txikian sarien 1807 bola sartzen  direnean zozketa hasiko da. Bertaratzen diren ikusleek zozketa aurretik aukera dute beren zenbakia ontzi handian dela egiaztatzeko.

Bolatxo guztiak ezpelezkoak dira, pisu eta tamaina berdinekoak (300 gramo, 18,8 mm), eta zenbakiak eta letrak laser bidez grabatuta dituzte.

2014an atera zen beranduen sari potoloa (13.437 zenbakia), eguerdiko 13:00etan. Azken  zozketak ia lau orduko iraupena izan zuen.

Aurten, potoloa inoiz baino potoloagoa izango da. Foru Ogasunak 10.000 eurora arte ez baitu atxikipenik ezarriko. Azken urteotan (2012tik) 2.500 eurotik gorako sariek izan dute atxikipena. Aurten, 10.000tik gorako sariei % 20 kenduko die Ogasunak.  Iaz, sari potoloarekin 320.000 euro, aurten 322.000.