Atharratzetik abiatu da 24. Korrika, festa giroan, pizkundearen akuilu izatea xede

Atharratzeko plazak (Zuberoa) jendez gainezka egin du ostegun arratsaldean, 24. Korrikaren hasiera ekitaldia dela eta. Giro aparta nagusitu da lehen unetik: musikak, irrintziek eta euskararen aldeko oihuek bete dute herrigunea. “Euskara gara” lelopean, 40 urte garrenean abiatu da Atharratzetik Korrika. Gainera, Hego Euskal Herrian jaieguna izanik, milaka lagun hurbildu dira, ekimenari arnasa kolektiboa ematera.

AEKko kideek eta Zuberoako euskalgile Oihana Larrandaburuk hasiera eman diote lasterketa erraldoiari, dantzari eta txalapartari zuberotarrek lagundurik. Mezua lekukoan sartuta, 15:30ean abiatu da Korrika. Goiz-goizetik giro ezin hobea izan da Atharratzen, hainbat ekimen antolatuta: txarangak, dantzaldiak eta gaiteroak, besteak beste.

Korrika engaiamendua da

AEKko ordezkariek Korrikaren garrantzia aipatu dute abiatu aurretik. Bixente Claverie AEKren Nazio Kontseiluko kideak azpimarratu du “aldarrikapen eguna” izan dela gaurkoa. Maider Heguy Ipar Euskal Herriko AEKren ordezkariaren hitzetan, gainera, Korrika ez da lekukoa elkarri emate soila, “euskararen aldeko engaiamendua” edo konpromisoa baizik.

Honakoak izan dira aurrenekoak lekukoa eramaten: lehenik, Euskal Irratiak elkarteko kideak, hedabideen bidezko hizkuntza-normalizazioaren isla gisa; bigarrenik, Xiberoko Ikastola elkarteak, hezkuntza komunitarioaren zutabe diren aldetik; hirugarrenik, Atharratzeko Herriko Etxeak eta Euskal Hirigune Elkargoak, tokiko instituzioen babesa agerian utziz; laugarrenik, Mintzalagun proiektuak eta AEKk, helduen euskalduntze eta erabilera sustapenaren ikur; eta bosgarrenik, Euskarabenturako kideak, belaunaldi gazteen konpromiso ibiltaria ordezkatzeko.

Hala, lehen kilometroetan euskararen biziberritze-sarearen aniztasun adierazgarria eskaini du, ohiko sinbolismo kolektiboari eutsita. Ondoren, lekukoaren ibilbidea Ozazeko eta Alozeko herriko etxeen eskuetara igaroko da, baita inguruko elkarte eta talde ugarirengana ere, horrela berresten delarik Korrikaren izaera herritar eta saretuaren funtsezko printzipioa.

Aurtengo ibilbideak 11 egunez eta 10 gauez zeharkatuko du Euskal Herria, herriz herri, lekukoa eskuz esku eramateko. Gaurko egunari dagokionez, Atharratzen hasi eta Lekornen (Lapurdi) amaituko da korrikaldia; tartean, Maulera iritsiko da arratsaldeko 17:00etan, eta, ondoren, Pettarra eskualdea igaro eta Nafarroa Beherean 19:19 aldera sartuko da, Amikuze eskualdetik. 

Handik Lapurdi aldera egingo du, Aiherratik sartuko da 22:10etan. Jarraian, Hazparne eta Lekorne bisitatu eta gero, berriz Nafarroa Beherera itzuliko da, Baigorritik barrena. Goizaldean, 03:00 aldera, Donibane Garazitik igaroko da, gauaren magian murgilduta. Pirinioak zeharkatuta Nafarroara igarotzeko, Luzaidetik, goizeko 04:00ak aldera iritsiko da. Korrikak ez du Ipar Euskal Herria erabat utziko, berriz itzuliko baita Lapurdira aurreraxeago. Ostiralean, berriz, Nafarroako Pirinioetan hasiko du eguna.

Helburua argi dago: euskararen aldeko aldarria berriro piztea eta komunitatea aktibatzea. Hamar egun barru, martxoaren 29an, igandez, Bilbon amaituko da 24. Korrika, baina gaurtik bertatik sumatzen da bidean sortuko den zirrara, urduritasuna eta emozioa.

Ibilbide osoa zuzenean ikusteko aukera dago ETB ON plataforman, EITBren telebista plataforma digital berrian. Euskararen lekukoa martxan da jada, eta Atharratzetik abiatu den oihuak Euskal Herri osoa zeharkatuko du beste behin.

Euskararen aldeko ekimenik jendetsu eta ezagunenak 45 urte bete ditu aurten, eta 24. ediziora heldu da. Aurten, 2.175 kilometro baino gehiagoko ibilbide horretan zehar, 3.436 lekuko hartze izango dira, inoiz baino gehiago, eta 460 herritatik igaroko da.