Hezkuntza Sailak lan eskaintzaren epeak luzatu eta jantokietako kuotak etengo ditu

Eusko Jaurlaritzaren Hezkuntza Sailak eskola jantokiak erabiltzen dituzten ikasleentzat aurreikusitako laguntzei eutsiko die, eta familiek ez dute jantokiko kuota ordaindu beharrik izango aurrez aurreko hezkuntza jarduera etenda dagoen bitartean.

Ohar batean, Cristina Uriartek zuzentzen duen Sailak adierazi du, osasun alertaren aurrean, eskola jantokiak erabiltzen dituzten ikasleentzat aurreikusitako laguntzei eutsiko diela eta, hartara, horretarako baldintzak betetzen dituzten familiek ezarritako zenbatekoa jasoko dute.

Bestalde, familiek ez dute kuota ordaindu beharrik izango aurrez aurreko eskola jarduera etenda dagoen artean, eta familiaren batek aldi horri dagokion kopururen bat ordaindua balu, zenbateko hori itzuli egingo diote.

Bestalde, Amarauna unibertsitatez kanpoko etapetako irakasleei zuzendutako plataforma semantiko berrian bildutako edukiak publikoak izango dira, eta irakasleek ez ezik familiek eta interesa duen edonork ere deskargatu ahal izango ditu.

Lanbide Heziketan, lantokiko praktikak eten egingo dira, eta Lanbide Heziketako titulua lortzeko behar diren praktika orduen kopurua bereskuratuko da, titulua lortzeko.  

Lan kontratudun hezitzaileek ere etxetik egin ahal izango dute lan profesionala, baldin eta zentroko zuzendaritzak horretarako baimena ematen badu, beharrezko euskarri teknikoa badute eta zerbitzua bermatzen bada.

Halaber, Enplegu Publikorako Eskaintzetan, izapideak egiteko aurrez ezarritako zenbait epe eten eta atzeratuko dituzte, hala nola 2020ko EPEkoak (epe berriak iragarriko dira), Ikuskaritzako EPEa (bigarren azterketa eten da eta dataren berri iragarriko dute), eta epe berriak jakinaraziko dituzte, gisa berean, hautagaien zerrendaren birbaremaziorako,  lekualdatze lehiaketarako, plaza berezien lehiaketetarako eta hezkuntza itunen eskaeretarako.