Kasedako gertakariak hilketak izan ziren, akusazioen arabera

Nafarroako Auzitegiak Casedako krimen hirukoitzaren epaiketaren lehenengo saioa hartu du gaur, eta akusazioek hilketatzat jo dituzte gertakariak, defentsak homizidioak izan zirela adierazi arren.

Epaimahaia osatuta eta aurretiazko alegazioen ostean, eskopeta tiroz hildako Fermin J.E. 50 urtekoaren eta Jose Antonio eta Cristian bere 20 eta 17 urteko semeen heriotzari buruzko epaiketa hasi da.

Julianen (Casedako herritar bat) bi anaia eta aita ziren. Amparo zen Julianen emaztea, eta emakumearen 53 urteko aitak eta 22 eta 17 urteko anaiek tirokatu zituzten biktimak.

Justizia administrazioko abokatuak akusazio fiskalaren idatzia irakurri du, eta bertan azaldu duenez, bikote arazoen ondorioz, Amparo Muniain de la Solanara joan zen gurasoen etxera, baina gero Julianekin itzultzea erabaki zuen, aitak kontrakoa eskatu arren.

Idatzi horren arabera, emakumea lagun baten autoan joan zen Casedara. Aitak etxera itzultzeko eskatu zion telefonoz eta bera eta bikotekidea joko zituela mehatxu egin zion.

Hori dela eta, Julianen aita eta bi anaia Casedara joan ziren, eta etxeko atarian geratu ziren erasoa galarazteko.

Arratsaldean, fiskalaren esanetan, Amparoren aita eta bi anaia joan ziren Casedara, eta bi eskopeta zeramatzaten autoan (bat maletategian eta bestea eserlekuan), zenbait arma zuriz gain.

Iritsi zirenean, eztabaida gogorra hasi zen bi familien artean, eraso fisikoak tarteko. Une batean, Amparoren aita eta semeetako bat ibilgailura joan ziren, eta azken horrek eskopeta hartu zuen eserlekutik.

Akusazioak azpimarratu du aitak eskopeta eskuetatik kendu ziola semeari, eta Julianen senideei tiro egin ziela gertutik, 2-5 metroko distantziatik.

Hiru akusatuek autoan alde egin zuten gero, baina Foruzaingoak harrapatu eta atxilotu egin zituen. Bi eskopetak, aitarenak (baimena zuen), atzeman zituzten.

Jose Antonio Sanchez Nafarroako fiskalburuak 60na urteko kartzela-zigorra eskatzen du (20 urte hiru hilketetako bakoitzarengatik) hiru auzipetuentzat, eta bereziki garrantzitsutzat jo du semeen inplikazio maila zehaztea, eta hilketak edo homizidioak izan ziren argitzea. Akusazioek uste dute hilketak izan zirela, nahita egindakoak izan zirela iritzita.

Bestalde, akusazio partikularrak azpimarratu du hiru akusatuak elkarrekin atera zirela Munian de la Solanatik "armategi bat" zen autoan, bi eskopeta eta bost labanarekin, besteak beste.

Abokatuaren iritziz, "semeak ibilgailuan zegoenaren jakitun ez zirela esatea gezurra esatea" da.

Bere esanetan, aitak eskopeta autotik atera baino lehenago, semeetako batek "atera, atera" esan zion, eta aitak tiro egin aurretik, beste semeak "egin tiro, egin tiro" oihukatu zuen.

Akusazio partikularrak 25 urteko kartzela-zigorra eskatzen du hilketa batengatik, beste 25 beste batengatik, eta espetxeratze iraunkor berrikusgarria hirugarrenagatik.

Aldiz, aitaren defentsa abokatuak adierazi du auzipetuak ez zuela hiltzeko asmorik, eta horregatik, hiru homizidio delitu egin zituela, ez zuela hilketarik egin.

Juan Carlosen defendatzaileak esan duenez, gizona, "ezkontideek bizi zuten egoeraz kezkatuta", Casedara joan zen "biekin hitz egitera", baina ez eraso egitera.

Horren harira, adierazi du autoan zeuden bi eskopetak eta arma zuriak "ohituragatik" zeudela hor, "ohitura desegoki batengatik", baina "ohikoa" dela ehiztari baten kasuan.

Abokatuak azpimarratu du gertatu zena ez zegoela "aurrez pentsatuta", aitak ez zuela "pertsonen bizitzaren aurkako erasorik egiteko asmorik", baina "uneko egoerak horretara bultzatu" zuela.

Akusatuak burua nahastuta jokatu zuela azaldu du. Horregatik, eta poliziari egindakoa aitortzeagatik, aringarria eskatu du.

Juan Carlos semearen defentsak, berriz, adierazi du ez dela justua bera auzipetzea, eta hori utziko duela agerian epaiketan.

Emilioi anaiaren abokatuak, bere aldetik, absoluzioa eskatu du, "delitu ekintzarik ez dagoelako".